NEW YORK.-Awe mainta a presentá e presidente di Venezuela, Nicolas Maduro I su kasa dilanti korte na New York. Esaki tabata e promé aparishon di Nicolas Maduro I su kasa dilanti di un korte despues di nan detenshon den e mardugá di djasabra kual a tuma lugá riba teritorio venezolano. Nicolas Maduro a deklará ku e ta inosente.
E detenshon di e presidente venezolano a pèrkurá pa tur klase di reakshon rònt mundu den wikènt tras di lomba. Di un banda venezolanonan den e pais I esnan ku a hui for di e régimen Chavista a selebrá den grandi e echo ku Merka a detené Maduro I su kasa. Na vários parti unda tin venezolanonan por a mira kon nan a subi kaya pa selebrá ku a baha Maduro.
Di otro a surgi otro gruponan ku a denunsia e komportashon I aktuashon merikano pa subi teritorio venezolano I asina violá tur lei internashonal di derecho di paisnan lider I Soberano. Mientrastantu awe mainta Konseho di Seguridat di Nashonnan Uni ku a habri aña bou di liderazgo di Somalia, a kuminsá trata e kaso serio ku a tuma lugá aña Venezuela. Vários pais a kondena e echo ku Merka ta violá tur akuerdo entre paisnan I Nashonnan Uni na momentu ku a hasi uso di forsa militar pa drenta un pais Soberano I kaptura e presidente I su kasa. Tin vários pais ku tambe a mustra ku e régimen di Nicolas Maduro tin hopi tempu ta hasi mal uso di poder I asta elekshonnan no a kumpli ku e reglanan básiko di demokrasia.
Durante di e promé presentashon di Nicolas Maduro den korte na New York el e deklará ku e no ta kulpabel di loke ta akus’é. Maduro a insistí ku e ta inosente. Entretantu e reunion di Konseho di Seguridat di Nashonnan Uni a finalisá.
