Nilda Pinto SBO 1 (Lagoweg) tin hopi pa ofresé e hóben di 16 pa 24 aña. Sea e hóben di AGO, esun di VSBO, esun ku no tin e kalifikashonnan manera lo mester tabata, pa nan tur tin oportunidat. Nos no mag di papia mas di Drop outs di e hóben for di skol.
Den un entrevista ku Djasabra, Melfose Cornelia direktor interino i Germain Rafael guia interno a splika kiko tur por ferwaktu di nan. E skol aki ta unu kaminda ta tuma studiantenan di AGO, VSBO si no a kaba i tambe si no tin niun kalifikashon anterior. Estudiantenan ku ta bin sin kalifikashon ta bai 6 luna pa haña trayekto inisial i despues nivel 1. E otro studiantenan por sigui nivel 1 ku horeka i kuido na Suffisant. I si ta téknika e hóben ke bai e ta bai Brievengat na otro Nilda Pinto. Loke nan ta bon den dje ta kuido. E studiantenan ku ta bin serka nan ta esnan ku pa kualke motibu a kai for di e sistema di enseñansa i nan ta purba empoderá e studiante pa nan logra nivel 1. I ora nan logr’é nan por sigui bai e otro nivelnan. Awor aki nan tin studiantenan ku ta kabando nivel 4 na Wageningen. Esun ku kaba AGO ku su sertifikado ta drenta e trayekto prinsipal sea den horeka òf kuido. I esun ku no a kaba AGO i no tin kalifikashon promé ku esei òf a yega VSBO PBL klas 3 òf a yega TLK òf PLK den klas 2 tambe ta tuma nan pero nan ta drenta e trayekto inisial di 6 luna.
Kuminsá skol na yanüari òf na ougùstùs
Señora Melrose a bisa ku na yanüari nan ta kuminsá ku un trayekto ku ta e parti 2 di e estudionan aki. Tambe nan ta kuminsá na ougùstùs tambe. Niun skol na Kòrsou ta kuminsá un SBO na yanüari pero Nilda Pinto ta ofresé. I si tin studiante ta bayendo VSBO i a pensa ku e ke kuminsá skol na desèmber, e no mester warda te ougùstùs pero por kuminsá na yanüari. Melrose a bisa ku awor aki ta imposibel papia di ‘Drop outs’ pasobra si e hóben sinti ku no ta bai bon, e por skohe pa bai SBO 1. Ku òf sin kalifikashon e hóben ta bon biní serka nan na Nilda Pinto SBO 1. Nilda Pinto SBO1 tin mas òf ménos 300 studiante.
Retonan
Pa loke ta nan eksperensia ku e hóben sin kalifikashon, Germain Rafael a splika Djasabra ku e hóben tur ta bin ku reto i p’esei nan lema ta ‘Vense tur Reto ban pa 100%’.
Tin ta bin ku reto por ehèmpel na e skol anterior e hóben no kier a traha pero tabata ke fásil,
Reto ku ta mama ke pa e hóben bai skol,
Reto di aktitut kaminda e dosente bisa algu i e hóben ta eksplotá i papia na manera ku no mester a hasié.
Reto ku kaminda e hóbennan ku ta bai skol i no tin kaminda pa yu keda; retonan emoshonal, hóben ku a pasa trouma.
Reto pa e parti finansiero ku e studiante no tin pa e yega skol.
Reto di karga responsabilidat, ku ta algu ku no a siña e hóben for di yòn i ta pensa ku ta hende tin di hasié pe.
Dikon un diploma
Serka nan na Nilda Pinto nan ta vense tur reto i pa medio e mentor ta guia e studiante ku un bon aktitut ta meskos ku un tayer yen i tur kaminda por bai kuné. Pa medio di diferente proyekto ta mustra e hóben ku pa e yega i porta habri den komunidat mester traha ba e aktitut. Esei ta sosodé pa medio di siman di proyekto Happy Hour Empower i prepará nan pa siña. Lag’é siña dikon e diploma ta importante pa nan.
Tur esakinan pa medio di mentor i bon ekipá ta yuda e hóben enfrentá su reto. Tin bia interno i tin bia asta eksterno. Tin bia e hóben no por vense un reto sin un guia profeshonal ku no ta na alkanse di skol i e tin di bai instituto pafó i skol ta yuda pa asina na final yega na e diploma. Pa esun ku tin problema finansiero nan ta asina adaptá e skema pa nan por bin skol kisas tres bia pa siman pa asina tòg nan por yega skol. Tin hóben ku ke bai traha i ta pèrmiti’é pa bai traha tambe. Na skol ta purba pone e vaknan di tal forma ku e hóben por tin un dia liber.
Un siudadano apto
Asta a yega asina leu ku via di tim di kuido a buska karchi di bùs pa e muchanan i asina purba vense tur reto. Nan sa ku e mucha ta einan pa un motibu i ku debí na asina tantu kos nan kai afó i no ta pone mas kos pa nan sigui afó. Ta motivá e hóben pa e ta un persona responsabel pa ora e yega eifó tur porta por habri pe i pa asina ta un persona ku por drei den bida, sin hende tei pa yuda. Nan ke yega na un siudadano profeshonal, madurá i apto pa trabou.
Profeshonal
Ta laga e hóben sintié ku, no ta pasobra ta nivel 1 e no ta un profeshonal pero asina e tin un diploma i ku e nivel 1 aki nan ta un profeshonal, un mihó asistente den horeka i den kuido. I tur proyekto ku tin na Nilda Pinto nan ta mare na algu pa nan siña. Por ehèmpel si e hóben ta hunga futbòl den pouze, nan tin di siña algu di dje. Tur kos tin un meta por ehèmpel si hunga futbòl e meta ta pa hinka gol. E hóbennan mester wak su tim. I hasiendo esei tur dosente ta pasa wak i ta mira e studiante den otro aspekto pa sa mas aleu kiko tin di traha ariba.
Enseñansa ta importante
Tambe ta hisa bandera i habri luna pa siña e hóben di patriotismo i pa nan kanta himno kompleto pasobra tin bia nèt e parti ku ta keda afó ta e parti real di patriotismo. Ta purba pa kada klas tin algu di apertura i nan mes ta hisa bandera i dirigié. I riba e dia ei un hóben di e klas ta presentá algu ku e por. I Nilda Pinto SBO 1 ta traha riba e parti pa mustra e hóben dikon enseñansa ta importante. Ta traha primeramente riba formashon di e ser humano. I p’esei un di e materianan ta ken e ta. E hóben ta siña para ketu ken e ta, den ki ambiente el a lanta i si e tin di keda den e ambiente ei, unda e ta bai, for di kaminda e ta bin ki impakto el a hasi den bida, kiko ta e parti di fuerte komo studiante. Ta siña e studiante ku e ta muchu mas ku su nòmber i fam.
Nifikashon di e man
Ta hasi uso di e man;
E dùim ta para pa kiko ta e parti fuerte di mi.
E wijsvinger ta unda mi ke yega,
E dede mei mei ta kiko at e logronan ku tin di tene kuenta kuné,
E dede di renchi kiko tin balor den su bida i
E dede chikí ta kiko ainda e ta chikí den dje i mester krese bai den dje. Kada dede tin un nifikashon i pa medio di esei e hóben ta haña ken e ta, kua ta su punto fuerte òf kiko e falta. I asina nan na skol tambe ta siña mas kiko mester traha riba dje ku e hóben. Na Nilda Pinto SBO 1 no ta bai skol ku buki sinta haña lès. Pero serka nan ta siña e hóben ku e tin di siña pa su diploma pero e ta siña pa bida. No ta siña na skol so pero unda ku e yega e por apliká loke el a siña. No ta siña djis pa siña pero kiko e tin mester. Ta laga e hóben sinti parti di e totalidat. E ta un famia i ora e yega Nilda Pinto e tin su mentor ku ta keda riba dje, wak su drechi i duna e hóben e responsabilidat tiki tiki.
Posibilidat
E hóben ku kaba e SBO 1 tin hopi posibilidat pa nan. E SBO 1 ta solamente un aña i despues di einan si ta kuido e por bai Wageningen, e por bai diferente direkshon i den Horeka por sigui tambe den diferente direkshon. E studiante ku hasi 6 luna i ku e ke téknika e por bai Brievengat. Melrose i Germain no por a bisa presis kua direkshon ta esun ku mas hóben ta skohe pe pasobra e ta varia kada aña i temporada. Por mira e hóbennan ku apesar ku nan skohe un vak nan ta mira Horeka komo un hòbi èkstra.
E 4 P
Na entrada di e skol, riba e muraya tin e 4 P-nan. Segun direktor di e skol meskos ku den merkadeo tin e P nan di preis i produkto, serka nan ora e studiante por a kuater P e mes por merkadeo su mes.
Nan ta para pa Presensia; e mester ta presente 80/20,
Prestashon pasobra si e tei so i ta djis benta riba banki i kana rònt e no ta konta. E hóben mester partisipá i ku su materialnan,
Patriotismo ta e parti di hisa bandera i banda di dje kon ta dil ku koleganan, dosentenan i duna rèspèt, kuido bo kosnan.
Porshento ta pa bai e 100%. I asina a laga e hende hink’é den dje pa e por merkadeá su mes. I den e kaso aki asina e studiante no bin skol mesora skol ta kuminsá wak ta dikon el a bin skol.
Envolví mayornan
Komo guia interno Germain a bisa ku nan ta haña nan na skol ku hopi hóben ku realmente mester di e push ei. Tin ora e situashon a kuminsá for di e skol anterior i e patronchi ta keda. E hóben ta kai den un sirkulo visioso i p’esei serka nan ta mustra ku si e ke logra e reseta di éksito e tin di usa ingrediente diferente. Usando mesun reseta manera skolnan anterior lo haña e mesun resultado. I esaki ta e último chèns pasobra despues di einan no tin mas. Ta esaki nan ta laga e hóben komprondé i ta e splikashon ku ta duna for di inisio na momentu ku e hóben ta presentá ku su mayornan. I mayornan ta hopi envolví. Ora envolví e mayor den e sistema, esaki ta yuda hopi.I serka nan e mayor ta haña su informashon. E vishon mas grandi pa nan di skol ta e diploma i un mihó aktitut. E hóben mester sali ku un patriotismo. E hóben ta drenta den un mashin di kambio na Nilda Pinto Suffisant. I nan sa ku no tur hóben por drenta e otro nivelnan pero ku e nivel aki i e diploma e hóben por bai traha.
Siman di proyekto
Durante nan siman di proyekto nan ta duna kontenido na vense reto ban pa 100% i nan ta trese role modèlnan, hóbennan ku a pasa serka nan mes. Tin mas persona den komunidat ku nan ta trese pa nan vense reto i lèsnan di bida. E hóbennan spesífiko den sierto estudio por ehèmpel horeka òf kuido ta bin ku profeshonalnan riba e tereno pa duna nan tepnan di kiko ta e aktitut pa trabou, kiko ta e sekreto ku a pone ku nan ta eksitoso awendia. Ke amplia e hóben su konosementu mas tantu. Ta sòru pa e hóben sintié ku e ta parti di e komunidat aki. Miéntras ku nan komo tim di dosente ta hasi lo máksimo pa logra pa e studiantenan finalmente.
Studiante briante
E direktor a menshoná e studiante briante ku tambe nan ta saka. E studiante briante nan ta saka a base di e kuater P-nan. No ta wak punto so pasobra no tur studiante por siña pa 10. Ta wak e bon aktitut pasobra esei ta pone porta habri. Tin studiante ku nèt no a sali studiante briante, nan ta bira tòg e studiante di estímulo. Ta saka un studiante briante di kada klas.
Dosente ku vishon
E dosente tin un vishon ora e yega skol, e sa kon e lo influensia e hóben pa logra éksito. I ku e vishon ei ta hasi ku ta keda mira e hóben ku e brel positivo. Pero si wak e hóben komo esun ku ta kansa nan, lo no logra. Nan ta wak e hóben komo esun ku talento. E tim ta traha ku e mente di logra un dia i ta pidi e hóben pa tene nan man i ban ku nan.
Proyekto di stazje
Stazje tambe ta un parti masha importante ku Melrose a papia di dje. El a bisa ku e impreshon ku e hóben ta laga atras ta masha bon. Mayoria bia nan hóbennan ta hasi nan stazje asina bon pasobra ta hopi training nan ta haña na skol. Den kuido tin e parti di mucha i hende grandi. I den Horeka dos periodo ta haña lès na skol kaminda ta kushina entre otro i 2 periodo ta bai stazje i ta kaba. Tur esaki ta sosodé den un aña.
