WILLEMSTAD.- Ku su 17 aña ya el a subi pasarela internashonal na 2 okashon. Nishayra Girigorie a debutá dia 27 di sèptèmber e aña aki komo moderno internashonal den shou di Valentino. I e siman aki, ayera el a subi pasarela internashonal un biaha mas komo modelo pa Celine.
EXTRA tabatin e privilegio di a entrevista komo promé medio di komunikashon Nisha, manera e ta konosí.
For di chikí e tabatin e aspirashon i e soño pa un dia ta modelo internashonal. Nisha a kuminsá komo modelo hañando e entrenamentu nesesario serka Grace Model Management (Instagram: @gracemodelmgmt) .
E no por a imaginá su mes ku un dia e lo a yega Fransia, Italia i Monaco den e último shou e siman aki. E ta kòrda kon el a yega Fransia, nan a dun’é algun paña pa el a pas, pone kana sin ku e tabata sa ku ta casting e ta besig kuné.
Ora Nisha a topa ku otro modelonan ku tambe a forma parti di e casting, e no a spera ku nan lo a skohe. Nisha tin e situashon ei ku e ta pensa ku e ta flaku, nan no ta gust’e; e outoestima ei no ta muchu haltu serka dje. Pero a skohe Nisha pa e debut di Valentino dia 27 di sèptèmber i ayera den e shou di Celine na Monaco.
Nisha su soño ta un dia pa ser modelo ta e profeshon ku ta bira su entrada. Awor aki e ta bayendo skol (SBO) na Kòrsou pero su soñonan ta yega pafó di frontera di Kòrsou.
Por sigui e entrevista amplio ku Nisha riba plataforma di EXTRA, Facebook extracuracao, website www.extra.cw i tambe Youtube. Kosnan positivo ta aki na Extra
