WILLEMSTAD.- Despues di 4 aña ainda Kuerpo polisial Kòrsou no tin kasi niun pista di esnan òf esun responsabel pa e atrako brutal i asesinato ku a tuma lugá na seru Machu, den área di Fuik dia 17 di sèptèmber 2017. Esaki bosero di Kuerpo polisial Imro Zwerver a konfirmá pa EXTRA.
El a bisa ku a drenta hopi informashon pero ningun no a yuda pa resolvé e kaso te ku awor.
Ta trata di kaso kaminda señora Cecilia Ignacia Alexander nasé na Kòrsou, 1e febrüari 1936, ku a pèrdè su bida despues ku malechornan a drenta su kas i atrak’é den oranan di mardugá ku e konsekuensia fatal.
Riba e dia ei alrededor di 13.20 or, Sentral di Polis a dirigí un unidat polisial na un kas na Kaya Seru Machu pa un señora di edat drumí abou den kas i no ta duna señal di bida.
For di un investigashon preliminar ku polis a hasi a resultá ku yu di e señora ariba menshoná a yega na kas di su mama i a nota ku un bentana di e kas tabata kibrá.
Via di un otro bentana a mira ku e señora di edat tabata drumí abou den su kamber i no tabata reakshoná.
Despues di un investigashon profundo a sali afó ku e señora a keda atraká i posiblemente maltratá den mardugá di e dia en kuestion.
Pa ku e kaso aki Kuerpo polisial a traha un dokumentario di e kaso, di kual por a skucha momento ku e señora a yama sentral di polis den oranan di mardugá i bisa ku e ta sinti piedra ta kai riba su dak i tambe ku e no tin lus na su kas.
Despues por a tende den e yamada, kon bentana di glas a kibra i kon e señora tabata grita ku tin un hòmber haltu ku pèchi a drenta su kas i ku arma den su man.
Ultimo kos ku por a tende e señora bisa ta “Dios yuda mi”.
Despues no a tende nada mas di e señora.
Kuerpo Polisial a laga pasa e imágen i e yamada ku e señora a hasi na sentral di polis, vários tep a drenta pero niun tabata konkreto pa nan por a yega na pista di e malechor òf malechornan.
Sr. Zwerwer ayera a bisa ku ainda e investigashon no a sera i ketu bai ta hasi un apelashon pa esnan ku por sa algu di kaso aki pa yama riba e number anónimo 108 pa asina polis yega na solushoná e kaso lamentabel ei kaminda un señora di 81 aña a pèrdè su bida di un manera hopi kruel den su propio kas.

LAGA UN KOMENTARIO

Please enter your comment!
Please enter your name here