Ministerio di GMN a anunsiá ku ningun pasahero ni tripulante di e krusero MS Eurodam lo ta permití pa desembarká na Kòrsou. E desishon aki ta basá riba un aumento signifikativo di kasonan gastro-intestinal ku tin aktualmente presente na bordo di e barku.
Segun investigashonnan realisá pa Ministerio di GMN i CDC di Merka (Center for Disease Control and Prevention) a raportá ku e krusero Eurodam a eksperensiá un brote di Norovirus durante e periodo di desèmber 2024 te yanüari 2025. Adishonalmente, un otro barku di e mesun liña di krusero, MS Rotterdam, tambe a konfrontá un brote di Norovirus den e luna di febrüari 2025.
Norovirus ta un vírus konosí pa su kapasidat di sobrebibí riba superfisie pa un tempu largu, i esaki ta oumentá e riesgo di transmishon.
Debí na e oumento di kasonan gastro-intestinal na bordo di e MS Eurodam, Ministerio di GMN a evaluá e situashon i a tuma e desishon di no permití desembarko di pasaheronan ni tripulante.
E desishon aki ta forma parti di e medidanan di prevenshon pa protehá e salú i bienestar di e komunidat lokal.
Ministerio di GMN ta komprometé ku e seguridat di salú di tur i ta sigui monitor e situashon di serka.
Ministerio di GMN ta apelá na e kooperashon di tur parti interesá i ta garantisá ku tur medidanan nesesario ta ser implementá pa prevení kualke riesgo di salú públiko.
(Foto File)
