No hasi awe loke ta duel bo mañan

Despues ku na 2002 el a sali rei di tumba Hubenil ku “Pika Pika”, awe Gilbert “Dibo” Doran ta bèk ku e korona di rei riba su kabes. Kòrsou ta den su Gloria lo bai liberá marcha di karnaval 2019. Un tumba ku palabranan inspirativo kual a keda komponé pa Dibo Doran mes, areglá pa Randal Corsen, melodia di Dibo Doran i kompañá pa One Flavaz.

 

Kansá pero ku zjeitu…..

Ku su kara bastante kansá, pero ku ainda e zjeitu den su stèm Dibo a konta Djasabra di su sentimentunan, su alegria ku e premio aki. “Djadumingu despues di festival di tumba mi a logra drumi bèk. Djasabra si mi a pasa lantá henter dia. For di djabièrnè 10 or di mainta i a drumi despues di Taki Tin djump in. I mainta tempran mi a bai misa di Seru Fortuna pa bai gradesí ser supremo”. Un hende no por imaginá nan mes ku e echo ku el a gana rei di tumba lo bai ta asina aki. El a bisa Djasabra ku bo por a skucha hopi pero e no por a imaginá su mes. Ora bo biba e eksperensia e ta algu kompletamente otro.

 

                Emoshonante…

Un momentu emoshonante pa Dibo tabata ora su mama i su tata pareu riba esenario ta bras’é despues ku el a sali rei di tumba 2019. Riba esaki Dibo a bisa ku e momentu ei el a mira henter su karera di festival di tumba su dilanti, e ‘struggle’ ku el a pasa pa skibi e tumba aki, e tumba aki a dun’é doló di kabes pisá pasobra e no por a keda kla kuné. Dado momentu el a bisa Randall ku e no ta bai mas. Dibo a konta ku e                                                                  tumba aki el a inskirbí sin tabatin’e kla ainda.

 

 

Kon el a yega na e tumba aki…

Segun Dibo e letranan el a yega na nan pa dos motibu; un ta ku nan a hasi un homenahe pa Boy Dap i ora nan a Google algun kos el a tuma nota di Karnaval tempu di su gloria, tumba tempu di su gloria. Di un mener Alex Alberto ku ya no tei mas riba e mundu aki, Dibo a tuma nota di algun video titulá “Kòrsou den su gloria di karnaval”. E palabra ei a toke. E ta kòrda ku trahando e tumba aki un dia el a manera kai den otro i el a bai na su wela i a kont’é e situashon. Su wela a bisé “No wòri mi yu, ku pasenshi bo ta gana gloria”. Asina el a bai a buska e nifikashon di Gloria. Gloria por ta spiritual pero tambe e punto máksimo di alegria. Por ehèmpel ora hende ta hopi kontentu ta bis’é “mir’é ei e ta den su gloria”. I Karnaval ta pone Kòrsou den su gloria. Ora di karnaval tur hende ta lubidá tenshon i tur problema i ora ei el a dun’é e título di Kòrsou ta den su Gloria. Kisas e ta zona kontroversial aktualmente den e situashon ku Kòrsou ta pasando aden pero p’esei Dibo ta bisa na inisio di su tumba ku e ta proklamá. Esei papa Dios ta bisa “Kaminda mas ku un proklamá, e lo realisá”. Esaki ta un di e promé tumbanan ku un mensahe ku Dibo ta kanta.

 

Un eksperensia inolvidabel…

16 aña pasá Dibo a gana rei di tumba Hubenil ku “Pika Pika” i awor ta e di 10 biaha ku e ta partisipá na rei di tumba grandi. Den e 10 biahanan aki segun Dibo, tur su tumbanan tabatin algu spesial. Pero e Kòrsou ta den su gloria ta un eksperensia inolvidabel.

 

Pa 2020 lo pens’é….

E djabièrnè di final di festival di tumba, Dibo Doran a hasi un deklarashon den un programa na radio bisando ku esaki lo ta su último bia partisipando na festival di tumba. Awor despues di a gana e premio máksimo e ta bisa, “mi a bisa ku despues di 10 aña mi ta tuma un break ni maske kua e resultado ta. Pasobra 10 aña kompitiendo,  mi a sali mayoria biaha den e tòp 5, kada bes promé finalista i no tabata nada fásil pa keda traha tumbanan ku ta keda e masa. Nunka bo ta kana di konvensé tur hende pasobra tin fanatismo mei mei, tin hende ku ta pensa si i no pero loke mi por bisa ta ku den e 10 añanan ei, si mi kue un promedio di 100% mi a logra 90% di aseptashon ku mi partisipashon. Mi no ke bisa mi ta kla pero e trabou ta difísil pa mi mantené i keda riba e mesun nivel i mesun energia. Hende ta ferwaktu ku bo ta bini ku algu meskos ku Gloria”.

Pa loke ta su partisipashon den tumba di 2020 Dibo a bisa ku e tin di pens’é. El a bisa di ta laga e periodo di karnaval aki pasa trankil i si tin un bon inspirashon atrobe i papa Dios dun’é e bon inspirashon atrobe ku bida salú i energia lo e tei den tumba 2020.

 

                                                                Ave Maria….

Dibo a kuminsá kanta ku 4 aña den kor di misa di Kayena Kleuterschool. Despues Kolegio Chaya Willems tambe el a kanta kor di misa. Nunka el a kanta den grupo ku tabata te despues ku su 11 aña na festival di tumba hubenil. I despues di eseinan el a drenta grupo Karabela i tabata toka. E tabata bal lès di blòk flùit ku 4 aña, perkushon ku 7 aña i ku 11 aña  despues di rei di tumba hubenil el a bai lès di piano. Pika Pika tabata e kantika ku el a sali dilanti di un grupo grandi ku ta festival di tumba hubenil i kanta su so. Ounke segun Dibo den kor di misa e tabata kanta Ave Maria su so. Ta un kantika na latin ku e ta kanta sin komprondé nada. “Uniko kos ku mi tabata komprondé ta Ave Maria i sobrá mi no ta komprondé nada. Dia mi a risibí mi promé santa komunion mi a kant’é komo promé biaha i mi a keda kant’é te dia ami a kaba Kolegio Chaya Willems ku ta skol básiko i despues di esei nan ta invitá mi na misa di Steenrijk pa mi bai kanta. Pero mi tabata bishitá misa di Seru Fortuna mas tantu i einan mi tabata kanta pasobra mi tanchi i wela ta bai einan”.

 

Dibo komo aktor….

Dibo a subi esenario si komo aktor na edat hopi hóben pa aktua den un obra ku el a hunga komo mata di wawabèri i e tabata papia mitar papiamentu i mitar ingles. E aktuashon Dibo tin di su mama ku pa hopi aña a aktua ku Anthony Jamanika i su tata tambe. Pero mas di su tata ei Opa Betti ku tabata eskritor, skibi komedia i aktua den diferente komedia i pone shownan kómiko.

 

Tumba tin derechi di eksistensia…

E aña aki tambe lo bai tende di AMAK e petishon na músiko/kantantenan pa kòrda toka e tumba ganadó durante di gran marcha. Relashoná ku e ponensia aki Dibo a bisa Djasabra ku tumba tin derechi di eksistensia i no di karnaval so pero por lo general. Dia nan a traha e tumba di Boy Dap e tabatin amigu ku no tabata sa ken ta Boy Dap. E sa ku ta difísil pa drenta tur kaminda pa splika un hende pero ta importante pa su generashon sa kiko tabatin ayera. Su base mas grandi di fanátiko ta hubentut i awor ku Dibo a hasi homenahe na Boy Dap a haña sa ku tin un mener ku a hasi hopi pa festival di tumba i a gana festival di tumba 10 biaha e ta un leyenda bibu pa loke ta e kompetensia musikal kultural mas grandi di nos pais. I e ta kontentu ku ta un edat hopi hóben e por a mira hopi di festival di tumba i tene e interes di hóbennan bibu. Banda di dje tin Ray kaminda tur dos tabata den GMO i a krese huntu. Tumba tin futuro i e generashon di nan tambe ta mira ku di un manera òf otro tumba tei pa keda. Tumba ta importante. E 5 dianan ei di festival di tumba, asta e dia ku no tin e festival no tin un tópiko ku no ta tumba. E aña aki ta Dibo, Ray i Amos tabata e faboritonan. E kos ta biba den komunidat o mester duna mas kuminda i mas kaminda pa kana.

 

Mensahe pa hóbennan….

Dibo komo hóben ta manda e mensahe pa nos hóbennan: “pensa bon promé bo aktua no hasi nada awe ku ta duel bo mañan. Mi a lanta den un bario Schelpwijk Brievengat, e periodo ei den dékada 90 ta hopi kos bo ta lanta mira i bo tin di hasi e desishon korekto, hasi e kos ku bo mayornan por bisa ku e ta orguyoso di bo i esei ta mi úniko mensahe na e hubentut. No hasi nada awe ku mañan bo ta lamentá. E libertat ta di bo i no kit’é di bo, e enseñansa ta di bo i niun hende por kit’é. Bo futuro no ta den man di mama ni gobièrnu ni Dibo pero den bo man. Si bo hasi bon e bon ta pa bo i si bo hasi malu e malu tambe ta pa bo”.

 

“Mi ta keda e mesun Dibo”….

Dibo no ke bida ku e ta orguyoso di su mes, pero si e ta bisa ku e ta kontentu. E ta laga pa su mayornan, su fanátikonan i Kòrsou ta orguyoso di dje. El a bisa ku e premio aki no a kambi’é, ora karnaval pasa e ta keda mesun Dibo. E ta embahador di karnaval 2019 i ser supremo a inspir’é ku e tumba aki. “Mi ta propagá pa mensahe yega. Tur hende a reakshoná riba e keknan den e tumba. Pero kòrda ku tin un introdukshon hopi bunita pa pueblo di Kòrsou biba i si tur e kosnan aki mi kita nan mi ta keda e mesun Dibo. Mi no ta mas ni ménos ku niun hende. Ta simplemente un tumba ganadó i mi ta biba e momentu ku papa dios a trese i pueblo a trese i e aseptashon inkreibel ku mi ta pasando den dje”.

 

 

SHARE

LEAVE A REPLY