ORANJESTAD – E mensahe of no a yega unda e mester a yega, of a ignora e mensahe di gobierno un dia anterior, cu ‘per direct’, no ta permiti e-steps, e-scooters, y otro vehiculo electrico riba dos wiel, riba caminda publico. Un recorido lihe diaranson mainta, a mustra hopi lihe cu tabata ‘business as usual’, y tabata parce te hasta cu tin mas e-steps cu nunca. Un chekeo cu gobierno, a mustra cu autoridad ta conciente di esaki y cu ta spera cu dentro di algun dia, e situacion lo cambia y cu e e-steps lo ‘disparce’. “Nos ta verwacht cu den algun dia, nan lo no tey mas” un representante di gobierno a confirma diaranson mainta. Nan tambe a tuma nota cu no a mira cambio, pero ta pensa cu porta e negoshinan kier purba saca lo maximo for di esaki te na ultimo.
E PROHIBICION
Tabata apenas 24 ora prome cu minister di husticia Arthur Dowers na nomber di Gobierno di Aruba a anuncia un medida inmediato (per direct!) pa prohibi tur tipo di step, incluyendo e-step y asta e-bike riba camindanan publico. En corto, tur vehiculo electrico di dos wiel. Segun e mandatario, cualkier persona cu wordo haya usando un di e vehiculonan aki riba caminda publico per direct, lo por a haya un multa di te cu 500 florin maximo. Ademas, autoridadnan lo confisca e step mes. Dowers a splica cu actualmente no tin ningun base legal cu ta permiti uso di e vehiculonan aki riba caminanan publico, y tampoco no tin un solucion rapido pa regula esaki.
AINDA NAN TEY
Manera indica, un recorido lihe diaranson mainta, a mustra cu nada no a cambia. Solamente na e parti di low rise hotels caba, por a nota tur e e-stepnan banda di caminda y tabata parce cu tabatin mas cu normal te hasta. Si esaki ta un reto di e companianan contra gobierno, of si simplemente logisticamente no a logra ‘piki’ nan, of mas pio, si e mensahe no a yega na e negoshinan envolvi pa nan stop cu e operacion aki, no ta conoci.
LEGAL
Manera cu a raporta tambe, no ta descarta cu e companianan ta buscando conseho legal urgente, y mientrastanto ta sigui opera nan negoshi normalmente. Y unabes cu e consehonan drenta, por cuminsa actua, sea ta nenga di kita e aparatonan, of ta kitanan, pendiente un caso legal. Gobierno a informa cu nan ta conciente di e posibilidad di caso, pero cu esey no ta bay strobe nan di actua.
REACCION
E reaccion tabata hopi. Mayoria hende cu a reacciona tabata positivo riba e decision di e minister. Otronan tabata menos entusiasma, y tabata cuestiona e forma, e decision y e consecuencia cu nan como doño di ekipo asina ta sinta cu ne aworaki. Esey lo keda trata den un otro raportahe.(NoticiaCla)
