Joeri Oltheten i Nifa Ansano

Mañan 5 di mei Wintertuin Curaçao ta lansa un proyekto  ku nos grandinan den e front. Joeri Oltheten direktor di Wintertuin Curaçao a konta ku ta trata di e e di tres buki pa dokumentá kurá di kuenta. Ta trata di un proyekto pa dokumentá kuenta di grandinan. A kuminsá kuné 2 aña pasá i ya dos buki a keda publiká. E biaha aki tin kuenta di diferente tema ku temanan universal manera di amor, wega di plaka, yerba, superstishon i kada partisipante mes lo subi tarifa i konta. Den último simannan a trein e grandinan pa skibi. E promé parti nan  skibi i e delaster parti ta kaminda nan a keda prepará pa e presentashon mes. A dòrna e kuentanan ku muzik pa e bira presentashonnan kasi teatral.


Di Ulanda pa Kòrsou….

Joeri a bin Kòrsou 3 aña pasá for di Ulanda. Na Ulanda e tabata traha ku Literair Productie Wintertuin. E proyektonan na Ulanda tabata proyektonan ku por a lansa na Kòrsou tambe i un di nan tabata ‘het Verhalen huis’ ku ta manera e tipo di proyektonan aki, pa bai kasnan di grandinan i envolví grandinan. Hopi biaha ora un ser kerí fayesé ta manera bo a sende un kashi buki na kandela, hopi rekuerdo ta bai pèrdí, hopi sabiduria ta bai pèrdí i p’esei a disidí di hasié na Kòrsou. Aki Joeri a aserká Birgen di Rosario, mirando ku nan ta hasi hopi pa stimulá grandinan pa keda aktivo i nan a bira masha aktivo. I asina Joeri a harma un tim di eskritor, manera Nifa Ansano pa traha riba e proyekto.

https://youtu.be/BwBmTo6WH60


Sèn no por paga…

E proyekto aki ta unu ku ta envolví hopi boluntario pero danki dios segun Joeri nan ta haña un ke otro yudansa di algun instansia internashonal entre otro di Ulanda i tambe Reda Sosial, Samenwerkende Fondsen. Ta un proyekto ku no por ta komersial pasobra ta hinka hopi tempu aden. E buki ta un kompilashon di kuentanan. Ta un proyekto ku sèn no por paga.

Loke ku nan ke logra; Joeri a bisa ku no por premirá e efekto di e proyektonan asina aki. Ora kuminsá, bo ta spera ku e grandinan ta haña algu plasentero i pa nan pasa nan dia na un manera mas interesante i trese mas alegria di biba. I segun tempu ta bai por ripará ku no ta nan so ta keda afektá, pero tur hende ku ta envolví den e proyekto. Entre otro e famianan tambe. Famianan tambe ta keda envolví, nan ta bin sinta huntu i yuda skibi kuenta i esei ta pone e impakto bira mas i mas grandi. I ora yega na presentashon di e buki, famianan ta super orguyoso. Nan ta siña algu di nan ser kerí tambe, pasobra tin biaha ta kosnan ku e grandinan no a konta nan famia. Via e buki nan ta konosé mas profundo nan mes famia. Tambe tin e parti di herensia kultural, pasobra ta trata temanan di nos kultura i asina ta preservá parti di nos kultura. Ta difísil pa midi e impakto pero si mira e reakshonnan despues, ta algu hopi great i di hopi satisfakshon, Joeri a bisa.


Nifa Ansano; kada edishon ta otro

Ta fásil traha ku grandinan? Pa Nifa Ansano e kontesta ta un SI. El a splika ku tin algun kos ku tin di tene kuenta kuné, por ehèmpel tin algun hende aki ku a kuminsá ku e proseso di alzheimer, pero por lo general ta basta fásil traha ku nan. Tin di tene kuenta ku nos grandinan, ken ku para nan dilanti, ta e hende ei ta manda i nan ta kumpli kuné. Mester tene kuenta ku e outor ku ta dirigí i sòru pa e tareanan ta fásil i komprendibel pa e grandinan. E grandinan ta protesta tambe. Entre otro “tene kuenta ku ta grandi nos ta”, asina Nifa a splika. Di otro banda, otro grandinan ta reta bu, pasobra pa nan e ta bai mas profundo ku nifikashon di e tarea. Tin hende grandi mas filosófiko. Pa Nifa e ta un bunita eksperensia i e atenshon personal ta pone ku e grandinan ta habri ku bo i e konfiansa ei ta pone ku nan ta dispuesto na konta tur kos.


5 luna di preparashon…

Pa a yega na e presentashon aki a dura 5 luna. E trayekto ta 3 luna kaminda tur siman nan ta bin huntu pa skibi, e di kuater luna ta redakshon kaminda e outor i Nifa ta sinta i wak e kuentanan, pa wak e parti artístiko i literario, kambia e bachi huntu ku e partisipante i despues ta sigui e parti di preparashon di e partisipantenan i e proseso di kontròl di idioma, e parti di ilustrashonnan ku ta bin aserka i e parti kaminda mester traha e buki, E buki ta keda traha na Ulanda. E último luna ta kaminda e bolo ta bai fòrnu.

E presentashon di mañan ta varia. Kada edishon ta otro. Riba un dia bo ta haña un selekshon di algun di e kuentanan ku ta bin den e buki. A base di esei ta wak pa e partisipante sintié kómodo, largura di e teksto, si e hende mes ta bai hasi su teksto i tin biaha debí na salú, ta un miembro di famia òf un miembro di e tim ta hasi e presentashon. E presentashon ta dura sigur 2 ora.


Satisfakshon…

Joeri a bisa ku e no por deskribí e satisfakshon. E promé edishon e ta kòrda tabatin un partisipante ku no ta papia, e ta sufri di alzheimer pero den e proseso e tabata kada bes mas den e proyekto, e mes tabata papia i bin ku ideanan i mester a wak e presentá na final. ‘Ora nos ta papia di grandinan nos ta papia kiko nan falta i mester, salu, remedi i kuido i ta hasi manera e ta un molèster, pero e bunita di e proyekto ta ku ta enfoká riba loke nan tin di ofresé ainda i esei ta super balioso pa komunidat total”, Joeri a bisa

Nifa a splika e momentu ku e partisipante ta realisá ku nan bida tin balor ketu bai. Tin diferente partisipante ku a fayesé durante di e trayekto i por tende di e famia ku nan ta kontentu ku nan a keda ku algu, esta e kuentanan ku e grandinan a skibi. Ora topa ku e públiko, hendenan ku no tin nada di aber ku e proyekto pero a kumpra e buki, nan ta keda asombrá. Na otro banda no por splika e detayenan di kon e hendenan ta reakshoná, e ta mishi ku bo, ta manera bo ta haña kantidat di 10 opa i oma nobo ku kada trayekto. Nifa ta purba bishitá nan, ta un konekshon ku nunka ta bai. Ta un konekshon ku no por splika.


E presentashon….

Den e promé edishon a bai ku 12 hende grandi pero a ripara ku 10 ta bon, pa asina logra un dinamismo den grupo, pasobra e ta kontagioso. Awor tin 10 hende grandi ku ta forma e presentashon di mayan den Hofi Wayaca. 10 ta nèt sufisiente i ku e kantidat di boluntario ku tin, no por hasié di mas sino e ta pèrdè su toke. E presentashon ta grátis i ta kuminsá mitar di 10 i ta kaba mèrdia. Por mira ku e grupo mas i mas ta birando mas grandi pa presensia e presentashonnan. E proyekto ta biba muchu mas leu ku loke a pensa i ta kere. I dia 25 di mei lo tin un All Star tambe ku grandinan.

 

Calviany Eleonora i Fredy Monte

 

Wilfred (Fredy) Monte ta un di e artistanan hende grandi den e proyekto di mañan. Fredy a konta ku e ta sintié masha dushi. E lo papia riba piropo di e tempunan aya pasobra esei no ta eksistí awe mas. Un di e piroponan ku Fredy a bisa nos tabata “Bo ta e lus ku ta lusa mi kaminda tur anochi”. Pa Fredy no tabata difísil pa trese e rekuerdonan di pasado bek. Fredy ta gusta tambú. E ta konta tempu di su tempu kon e ta bai tambú pero e no por balia tambú. I esei ta pone ku e ta para un kaminda i keda zoya su kurpa i e ta bai ariba i bin abou i ta gosa sam sam ku nan ku ta riba e dansflur. I si mira e tambúnan di ántes i awor, Fredy ta haña ku voral e sla di tambú no tei mas. No ta sinti e ritmo di tambú manera ántes. Awor bo no sa ki ora e tambú a habri ni sera. E ta gusta tambúnan di Zojojo te awe. Fredy ta invitá tur hende pa bin wak e presentashon mañan i pa duna e grandinan e kurashi pa e obra aki.


Nan a bira un famia…

Calviany ta outor di e obra. El a splika ku durante di 5 luna nan a traha ku e grandinan i te asta el a bira un kustumber. E sa ku riba djárason e ta dediká na nan. Outomátikamente bo ta prepará e material, kombersá ku nan i nan ta bira manera un famia sigur durante di e 5 lunanan ei. I despues di e 5 luna ta sigui den kontakto ku nan. E kos importante ta ku nan ta kompartí ku otro. Calviany sa bishita kas di hende grandi normalmente. E ta guia di Museo tambe i outomátikamente e ta bin den kontakto ku grandinan. Mayoria biaha e ta traha ku grandinan, ta for di nan e ta siña i asina sa mas kon kos tabata e tempu ei. Segun Calviany, kada eksperensia ta un i mas bo siña mas bo sa i mas bo por sigui pasa pa nos hóbennan. Tur e kuentanan tin un toke di Calviany pasobra el a revisá nan. E promé ku lo presentá mañan ta un orashon. Ora a skibié e no tabata un orashon pero a bira un orashon. E presentashon di mayan na Hofi Wayaca ta primintí di bira grandi!

 

 

 

LAGA UN KOMENTARIO

Please enter your comment!
Please enter your name here