Nederlandse Zorgautoriteit ta preokupá

DEN HAAG.-Nederlandse Zorgautoriteit (NZa) no ta kere ku ta bon idea pa laga hospitalnan na Ulanda eskala i subi e kantidat di kamanan pa duna kuido na pashèntnan di Covid den kuido intensivo. Landa tambe ta konfrontando e realidat ku apesar ku e kantidat di siudadano bakuná a oumentá, tòg nan ta mira ku e grupo di pashèntnan den hospitalnan i sigur kuido intensivo ta sigui subi. Nan realidat ta ku praktikamente tur esnan ku Covid den kuido intensivo ta hendenan ku no ta bakuná.

Profeshonalnan den kuido tampoko no ta di akuerdo pa oumentá e kantidat di kama den kuido intensivo. Pa NZa, tur kos ta mustra ku si bai subi e kantidat di kama den departamentunan di kuido intensivo lo por kondusí ku e personal di kuido ta kansa i ta bira malu, pues apsentismo bou di trahadónan di hospital.

Gabinete demishonario Rutte ta pensando ku eskala di desèmber 2021 te ku aprel 2022 di tal forma ku hospitalnan por atendé mas ku e 1350 kamanan di kuidonan intensivo pa atendé spesialmente ku pashèntnan di Covid.

Manera ta konosí na Ulanda e preshon riba gobièrnu pa kita tur medida i permití e komunidat biba den tur libertat manera nan a kustumbrá ta grandi. E tim di kalamidat ku ta atendé e pandemia aki ta pidiendo gobièrnu pa pèrkurá pa mihó implementashon i kontrol di medidanan ku ta na vigor. Tin medida pa tene distansia di un meter i mei (1.5m) pero niun hende no ta kontrolá ni no ta kumpli ku e medida ei. Ku hopi beheit a anunsiá e QR-code pa yuda e proseso di kontrol na entrada di establesimentunan i asina evitá plamamentu di e vírus den grupo grandi, pero sea no ta usa e QR-Code òf no ta us’e na e manera korekto. Mas i mas den e komunidat hendenan tin e pensamentu ku no mester tene kuenta ku medidanan di Covid mas. Riba e posibilidat pa bini ku medida speshal pa esnan ku no a bakuná i duna mas libertat na esnan ku si a bakuná tin hopi diskushon pasobra den e ámbito ei si tur hende ta haña ku no por deskriminá. For di gobièrnu ulandes a laga komprondé kaba ku medidanan por bai den tur direkshon inkluso medidanan mas severo kontra esnan ku no bakuná.

Awe djamars mèrdia nèt 12:05 na Ulanda personal den hospitalnan akadémiko a bati man pa otro. E aplouso tabata rònt Ulanda pa empleadonan den hospitalnan universitario. Den forma di un protesta tur e ocho hospitalnan akadémiko a disidí ku nan ta traha segun un skema di djadumingu riba e dia aki.

 

LAGA UN KOMENTARIO

Please enter your comment!
Please enter your name here