CIUDAD DE MEXICO.- E presidente di México, Clauda Sheinbaum, ayera a rechasá e posibilidat ku Merka lo aktua militarmente kontra di kartelnan di droga den teritorio mehikano. E opshon ei a keda menshoná pa Ronald Johnson, nominá pa presidente Donald Trump komo embahador den México, durante un oudiensia den Kongreso norteamerikano pa su ratifikashon.
“Nos no ta di akuerdo. El a bisa: ‘Tur kos ta riba mesa’. Pues no, esei no ta riba mesa, ni riba stul, ni abou na suela, e no tei ningun kaminda”, segun e mandatario iskierdista.
Durante su presentashon den Senado, kongresista Chris Coons a puntra Johnson riba su opinion tokante akshonnan militar kontra di kartelnan den teritorio mehikano sin e konosementu òf konsentimentu di gobièrnu di México.
“Mi sa ku presidente Trump ta tuma hopi na serio su responsabilidat pa sigurá bida di siudadanonan norteamerikano i, si lo tin un kaso den kua bida di siudadanonan norteamerikano ta den riesgo, mi ta kere ku tur e kartanan lo ta riba mesa”, segun Johnson a bisa.
E deklarashonnan di Johnson a tuma lugá tres siman despues ku e gobièrnu a stèmpel ocho grupo kriminal latinoamerikano – di kua seis mehikano- komo teroristanan ku nan a akusá di ta hinka fentanilo den Merka
Na e okashon ei, Sheinbaum a atvertí ku ounke ta un desishon outónomo di Washington, e no mester bira “un oportunidat pa invadí soberania mehikano”.
Ayera, e presidente mehikano a trese dilanti ku tin un “hopi bon koordinashon” entre México i Merka, ku ta kompartí un frontera di 3.100 km, den “konfiansa mutuo” i e rèspèt di soberania di kada nashon. Sheinbaum a agregá ku si Johnson keda ratifiká pa senado “lo tin un bon relashon”, pero a asentuá ku “ta respetá México”.
Den su diskurso siman pasá den Kongreso, Trump a bisa ku a yega ora ku “Merka tin ku hiba guera kontra di kartelnan” i a denunsiá ku e parti mehikano dje frontera “ta dominá den su tonalidat” pa gruponan kriminal.
