CARACAS (AFP).- Hospitalnan na Venezuela a nenga na duna kualke informashon riba kantidat di morto i heridonan dje bombardeo norteamerikano ku a hiba na kaptura di Nicolas Maduro. AFP a bishitá shete sentro médiko dje kapital venezolano sin por a haña informashon, miéntras ku tin rumornan ku ta referí na sigur 70 morto i 90 herido.
E korant The New York, Times, a informá di 80 morto segun informashon risibí serka un fuente di gobièrnu, miéntras ku un periodista venezolano a publiká un lista ku nòmber di 18 militar kende a pèrdè nan bida. Supuestamente nan tabata forma parti dje kuerpo di seguridat di Maduro.
“Nos tin òrdu pa no duna informashon”, segun un funshonario dje hospital militar Carlos Arvelo. Outoridatnan te ku ayera nochi no a duna un saldo ofisial di kantidat di morto.
Maduro a keda kapturá den un kas dje base militar mas fuerte den e kapital venezolano. Tabatin enfrentamentu entre militarnan norteamerikano i e eskoltanan di Maduro. E minister di defensa general, Vladimir Padrino, a denunsiá ku nan a keda asesiná “ku sanger friu”.
