No ta e kantidat ta konta pero e kalidat di guia ku PWF ta duna

296

Prinses Wilhelmina Fonds Curaçao ta den nan luna di kolekta.  E fundashon ta duna guia i asistí e persona ku kanser. I esaki no ta solamente hende grandi pero tambe nos muchanan. I ora nos ta referí na guia i asistí e mucha no ta solamente esun ku kanser pero e mucha ku su mama, tata, tanta, un miembro di famia tambe tin kanser.

E siman aki nos a papia ku sra. Frieda Geller presidente di e fundashon i sra. Lilian van der Burg- Goeloe ku ta miembro di e fundashon i tambe ta enkargá ku nos sekshon di muchanan. Sra. Geller a konta kon bin a yega na un sekshon di mucha. ‘Nos ta hasi tantu trabou pa asina tantu tipo di kanser i hende, ku ta asina tantu página mester tin pa deskribí loke nos ta hasi”, ku e palabranan aki sra. Geller ta yama nos danki pa duna nan asina tantu atenshon. Kanser serka mucha i e konsekuensianan riba e mucha i su famia.

10 aña kaba hasiendo e trabou públikamente

Sra. Geller tabata enkabesá e departamento aki pero a pas’é over pa Lillian. E departamento a keda ekspandé ku loke nan ta hasi. Mas òf ménos 10 aña pasá RBC bank a inisiá un ‘walk’ pa e muchanan den Karibe. Den Karibe no ta mes afortuná manera aki na Kòrsou/ na Kòrsou no tin di wòri ku tin di paga pa e muchanan haña tratamentu pasobra SVB i seguro ta paga. Pero den e otro paisnan si e tratamentunan ta bai di otro forma. RBC a organisá e ‘walk’ i a repartí e sèn i PWF a haña un parti di esaki i huntu ku esaki PWF por a lansa públikamente loke nan tabata hasiendo kaba, pero tabatin dòkter no ta laga sa ora un mucha tin kanser. Pero esaki ta komprendibel pasobra un mucha ku kanser ta bai Ulanda mesora. Pero ora PWF haña sa nan ta yuda. Sra Geller ta kòrda un mucha hòmber Francis ku ta biba 30 aña kaba na Hulanda pero e tempu ei e tabatin 14 aña. Ta e trahadó di PWF Alejandra Wieske a salba su bida pasobra tabata tarda pa mand’é Ulanda i Alejandra a pone pia abou i e mucha a bai Ulanda. Francis a bai Ulanda, el a pèrdè su pia pero el a bai den un proyekto ku el a haña un pia falsu i te awe e ta un tata. Esaki ta mustra e historia i loke ku PWF ta hasi.

 

Mayoria biahe mucha ta skapa di kanser

Mayoria bia ora e mucha haña kanser ta skapa pero tambe mester bisa ku ora bisa un mucha tin kanser e ta pió ku tur kos. E tata i e mama ta bira destruí i e trayekto ei ta masha difísil pasobra e mucha mester bai Ulanda. E mucha ta haña diagnósis aki pero e tin di bai Ulanda pa rekonfirmá e diagnósis.  E tin di bai Ulanda i kisas e mucha na e momentu ei no tin pasport, e no tin paña di friu, e no tin maleta i no ta e so pero e mama i tata. SVB ta kubri gastu di e mama pero e tata tambe ke bai. I asina PWF huntu ku Ronald McDonald ta uni forsa pa wak kiko mester i kompartí e gastunan pa e famia por bai. Sa sosodé ku tin mas yu den e kas i si ta beibi e no por keda atras. E kos di mas difísil ta ku e yu ta malu pero e kos ta ku e tratamentu asta por dura henter un aña. Imaginá ku bo tin bai laga bo kas, trabou, famia pa henter un aña. I PWF su trahadónan sosial ta atendé ku esei. I hopi bia ta asina ku na Ulanda e mama kisas nunka a biaha i no por papia bon ulandes PWF ta sòru pa asta un hende yud’é ku e ulandes i papiamentu. Hopi kos ta bin aserka i un hende no por imaginá su mes segun sra. Geller. Den direktiva di PWF nan ta tuma sierto desishon pasobra den e trayekto ei tin gastu ku nan no tin kisas. I nan tin e tarea duru di disidí kiko por i kiko no por. Pa 99% nan ta bai di akuerdo ku esakinan ora mester. I p’esei nan mester di e fondonan.

 

E kantidat no ta importante pero e kalidat

I ora e muchanan bin bèk e kos no a kaba pasobra nan ta bin bèk i no ta eksaktamente e mucha ku tabata siña bon, no ta eksaktamente e mama ku ta bin bèk i no tin trabou i PWF mester sigui guia. I tur e problemanan ku ta bin despues. Na Kòrsou ora kaba e tratamentu na Ulanda, por hasi e ‘follow up’ na Kòrsou i esei ta bon. Ora nos ta papia di kantidat di kaso sra. Geller a bisa pa no wak e kantidat pero e kalidat ku nan tin di hasi ku e famia. Danki Dios ku tabata 3 pa 5 kaso ounke nan mes ta di mas kaba. Un hende sintá sin por komprondé loke ta sosodé por bisa ku ta hopi kos pa un mucha. Pero ta hopi kos ta bin kuné. No ta un….. i so ta bai yuda e mucha pero pro ta un trayekto di hopi aña. I esaki nan por a sali públikamente pa 10 aña kaba i bisa kiko nan ta hasi. Huntu ku Ronald McDonald nan ta sa mesora ku tin mucha ku kanser. Ronald McDonald ta puntra di e mucha ke yudansa i asina PWF ta kuminsá. I asina nan ta traha huntu.

 

Siña kon dil ku emoshon

Lillian van der Burg-Goeloe ta enkargá ku e sekshon di e muchanan. El a konta Djasabra ku e trahadó sosial ta esun ku ta guia e mucha, ora nan haña esaki di Ronald McDonald. Ta yuda henter e famia. Un mucha ta mas sensitivo pa ku e malesa i ku e notisia. I banda di e mucha ku ta bira malu, tin e muchanan ku nan mama, tata, ruman a bira malu i tambe mester di yudansa. E muchanan ei ta kai den un buraku pasobra hopi hende no tin tempu pa nan. For di aña pasá PWF ta pone atenshon na e muchanan ei ku ta kai den e buraku di emoshon i tin diferente aspekto ku ta trata ku na. E trahadó sosial ta indiká kua mucha ta kai den e proseso ei i mester di atenshon. Tin diferensia kurso ku nan a kuminsá kuné pa kon dil ku e luto di a pèrdè un famia òf si e famia a bira bon bèk i kon ta sigui ku e emoshonnan. PWF a kuminsá ku algun kurso huntu ku sikólogonan profeshonal pa sa kon ta atendé ku luto i kombersashonnan spesial pa mucha ta yud’é kon dil ku e  situashon ku e ta aden. E Resilensia kon ta sigui ku e situashon. Tin bia ta haña ku ta dos òf tres ruman tin di sigui ku e kurso.

 

Fakansiplan

Tambe PWF tin kosnan dushi ku ta hasi ku e muchanan. Tur djabièrnè, e muchanan ku tabatin kanser i ta sigui bin serka nan, tin Knutselles. PWF ta un kaminda pa nan sinti nan konfortabel. E muchanan ta sinta ku e otro muchanan ku tambe a pasa den sierto kos i nan ta pasa un atardi plasentero. Nan tin nan departamento di rekreashon i terapia ku ta yuda i asina tur djabièrnè  ta tuma lugá. Tambe e aña aki ta e di dos bia ku tin fakansiplan i e aña aki pa promé bes e tabata 4 dia i e muchanan a keda drumi einan. Kada mucha tin su karakter i su forma pero e muchanan a pasa dushi. Tabatin algun spònser ku a yuda pa asina por a tene gastunan abou. I e muchanan a haña un tempu plasentero pa asina e famia na kas tambe a haña un luf kue yu ta pasando dushi tòg.

 

A yuda ku unifòrm

Tambe PWF ta yuda muchanan den nesesidat ku unifòrm di skol. E aña aki a yuda 22 mucha i danki Dios na e fondonan i kolektanan di pasado a yuda e muchanan aki. Asina por mira ku ta diferente kos PWF ta hasi pa e mucha haña atenshon. I e mucha sa ku tin trahadó sosial pa papia kuné, e mama tambe por papia kue trahadó sosial i buska solushon pa kualke problema.

 

E trahadónan tin hopi aña di eksperensia, tin ku mas di 20 aña i nan sa kon ta atendé ku diferente hende grandi i chikí. I asina por drenta den sea e grandi òf chikí. Meskos e sikólogo ta spesial pa mucha. No ta laga e mucha desampará pero ta yuda kaminda por.

 

Plasentero i strukturá

Na Kòrsou tin un averahe di 6 mucha ku kanser pa aña. I no ta tur mucha ta bai serka nan i tin mayor ta preferá na no envolví PWF. I p’esei ta difísil pa bisa si e kasonan ta subiendo kada aña òf no. I mester kambia e persepshon ku PWF ta pa hende grandi so. I danki Dios por manda e mucha Ulanda ku ta spesialisá pa mucha ku kanser na Utrecht i e aña aki a kuminsá wak kua mucha ta keda afektá indirektamente i e grupo ei tòg ta basta grandi segun Lillian. I p’esei e kolekta ta asina importante pa asina e mucha por pasa plasentero i strukturá. Nan por sigui duna e mucha guia i hopi mas. Nan ke ta un balor agregá pa e mucha i den e famia su bida.

 

Papia kuné

“Nunka no pensa di laga e mucha den banda. Purba papia ku e mucha. Bai pa e mucha, e ta un hende, papia kuné, kombersá kuné, e no tin un malesa ku ta straño pasobra kon ku bai bin kanser por toka nos tur. Nos tur ta mama i tata, nos por tin tanta òf wela i no laga e hende desampará òf den banda”, segun Lillian. El a bisa pa duna e hende atenshon i tei pe. Ta djis un orea pa tende ta yuda grandemente i ta humano.

 

 

LAGA UN KOMENTARIO

Please enter your comment!
Please enter your name here