No ta nesesario kana sin djente, tin opshon

Dra. Yuliana Mendivil; Curaçao Dental Center

Nos djentenan i kuido bokal ta hopi importante. Su kuido por evitá malesa i tambe su kuido por sòru pa sierto malesanan no afektá nan. den un entrevista amplio, Yuliana Mendivil, dentista i ko propietario di Curaçao Dental Center, ta duna nos splikashon kiko pa tene kuenta kuné. E entrevista di dra. Yuliana Mendivil lo ta den korant i riba nos plataforma digital. Awe nos tin e promé parti kaminda e ta papia di kuido di djente.

Implante òf removibel

Si ántes nos ta keda kana ku boka sin djente òf ku falta di djente pasobra tabata difísil pa hasié na Kòrsou, esaki ya no ta nesesario mas pasobra tin opshon. Nos a papia ku dra. Yuliana Mendivil kende por sierto su spesialidat ta esaki. El a bisa ku implante ta un opshon. E ta remplasá un djente ku a pèrdè i riba dje ta bin un korona ku ta keda figo riba e djente i asina por smail sin e buraku. I tin e opshon removibel ku tambe ta bon pasobra por smail mihó, por kome mihó i ta konservá e espasio di djente sin pèrdè e harmonia di e djente.

Hopi desaroyo di teknologia

Tin hopi desaroyo teknológiko den área di onkologia. Pa dra. Yuliana, kada klínika ta desaroyá nan sistema. Den nan kaso, i e sa ku hopi klínika mas ta desaroyá riba e tereno aki, i esei ta e ‘scanner’ dental. Ku esaki por hasi sierto tratamentu ku ántes tabata nesesario pa tuma midí ku un pasta i awor aki ta skèn e boka di e pashènt. Ta skèn i mand’é pa e laboratorio i nan ta traha esaki. Tambe e ta yuda mustra e pashènt e djente i asina e ta haña vishon di su situashon i unda ke bai. Ta un desaroyá hopi interesante.

Tratamentu spesialisá

Tin un téknika ku dr. Yuliana ta hasi ku ta esun pa un pashènt ku no tin djente mes òf e djentenan ku e tin no ta bon. E ta pone 4 implante ariba òf 6 abou i wanta e prótesis riba e implantenan sin ku e pashènt tin di kita pone i e ta meskos ku djente normal. E ta un téknika ku nan ta hasi hopi na e sentro di Curaçao Dental Center.

Diseño di sonrisa no ta pa tur hende

Diseño di sonrisa ta masha na moda awor akí. Pero e no ta pa tur hende. Dra. Yuliana Mendivil ta splika nos ku si ta un pashènt ku su karni di djente no ta saludabel, e no tin bon higiena, e tin bruxismo severo, i sierto kasonan, esaki no por. Tur kos mester ta saludabel promé ku hasi e tratamentu ei. Kada deseo ta personal pero tin kaso ta hasié tòg. Ora veila un djente mester tene kuenta ku e no ta krese mas manera ora ta veila un uña. Nos mester ta hopi konsiente di esei i ser responsabel. Kada pashènt mester ta responsabel unda e ta bai i informá bon. Tin pashènt ta bai afó i bin bèk ku karn’i djente inflamá i despues tin konsekuensianan ireversibel. I tin opshon si no por hasi e diseño di sonrisa. Yuliana a bisa ku ta e konsepto ku e pashènt tin di bunitesa. Tin pashènt ta wak riba medio sosial i su konsepto di bunitesa ta kambiando. Yuliana sa ku tin hopi dentista ta luchando pa e bunitesa ta algu natural. Bo djente natural ta bunita i tin hende ke esaki blanku blanku manera lechi. Esaki ta sobrepasá e realidat i nos mester ta kouteloso kuné.

Bruxismo

Papiando di bruxismo dra. Yuliana a splika ku esei ta ora e pashènt ta sea raspa djente òf primi duru riba su djentenan inkonsientemente. E por ta debí na strès, òf kontakto di djente dimas òf e manera ku e djente ta no ta kuadra. Ta traha un plakat spesial pa e pashènt bisti. E por ta pa bisti den dia, anochi òf ora ku e ta raspa òf primi e djentenan. Esaki, sinembargo, no ta e tratamentu final. Por ehèmpel si e pashènt ta raspa djente debí na strès, no ta ku e plakat ei su ta solushon’é pero e tin di hasi sierto kosnan ku ta duna e relahamentu ei. I den e kaso aki tin e sistema di ‘laser’ ku ta toka puntonan no solamente rònt di e boka, pero na e kara i asta na garganta. E ‘laser’ ta stimulá e sélulanan.

‘Verstandkies’

Un pregunta ku el a yega di haña hopi serka pashènt ta ku si nan mester ranka e ‘verstandkies’.  Pa dra. Yuliana no semper mester rank’é. Ta ora e ta hasi molèster i doló ta hasi un estudio pa mira si ta importante pa sak’é i p’esei e kontròlnan di kada 6 luna ta importante pa hasi. I ora ranka un di e ‘verstandkies’nan aki, no nesesariamente mester ranka tur. Tin bia tin di sak’e debí na espasio i e por akumulá kuminda. I si e ta krese di manera ku e por daña otro i por pèrdè mas ku un, ta un kontròl regular di boka lo evitá tur esei. Ora ranka esun di abou, esun di ariba lo sinti falta pa morde ariba i esun ariba por sigui krese pasobra no tin nada pa wanta i p’esei tin bia mester ranka tur dos di e mesun banda.

Tur tratamentu ta pagabel

Tur loke Curaçao Dental Center ta hasi ta pagabel. Yuliana a bisa ku nan ta traha por ehèmpel ku SVB pa loke nan ta kubri manera muchanan te 18 aña i pashèntnan riba 60 aña . I nan ta traha ku tur otro seguro dependé e pólisa. I si ta pashènt privá tambe por paga su tratamentu den fase. Curaçao Dental Center ta keda den edifisio di PWFC na Post 5.

Konseho

Yuliana su konseho ta pa yuda nos muchanan pasobra ta einan e kuido dental ta kuminsá. E ta pidi tur mayor pa ta pendiente i no duna e muchanan hopi mangel i kuminsá laba djente for di ora e saka e dos promé djentenan abou. Na skol i krèsh ora di hasimentu di aña e mucha ta haña hopi kos dushi. Kisas mester yega na un palabrashon ku e yu pa e bai kas ku e kos dushi ei i asina komo mayor por kontrolá kiko e ta kome. E ta un konseho importante pasobra ora e mucha tin su djente, i esakinan ta salú, ta ménos trabou. I pa nos adultonan e ta pidi pa hasi e kontròlnan na dentista kada 6 luna, usa ‘dental floss’, laba djente promé bai drumi. Esei ta e regla di oro pa garantisá salú bokal.

Curacao Dental Center

Tel: (+599) 9 6707615 – (9) 8687615

PWFC Building

Schottegatweg Noord 5F-5

curacaodentalcenter@gmail.com