Pasahero di Aruba Air
WILLEMSTAD. – Un pareha hóben ku tabata pa bai un kasamentu na Aruba, a pasa den un sustu di nan bida ku defakto ta keda tumá manera un suseso di tur dia.
Tabata 9 di mei tras di lomba, den oranan tras di mèrdia avion di Aruba Air ta lanta buelo for di Kòrsou, rumbo pa Aruba, ora ku un ratu despues a resultá den un drama total den e avion ku tabata den laira.
E pareha hóben a splika EXTRA ku ta e hendenan sintá den e avion so por splika kiko nan a pasa aden i ku ta minütnan ku kada un tabata parse oranan largu, ora ku e avion tabata dal buèlta pa tira kombustibel afó pa nan por baha.
Despues di a tende un zonido duru, e stewardess a sòru pa un pániko di otro mundu ora ku el a kuminsá grita i kuminsá resa. Pasaheronan a kuminsá yora i otro a haña ataka. E stewardess a pone tur hende den pániko i asta e no por a dominá su ingles mas.
A resultá ku tabatin un eksploshon den motor di e avion.
Despues di un ratu, avion a keda ketu ketu i tur hende tabata resa pidi Dios pa e avion baha bon.
E pareha hóben a konta EXTRA ku e loke bo ta sinti, nan no por splika un hende, pues sinta warda ora bo morto yega, pa motibu ku e momentu ei niun hende den a avion no sa kiko ta bai sosodé, ku e úniko kos den mente ku e avion ta bulando riba un motor so.
Despues ku e avion a baha i algun persona a papia ku e pasaheronan pa yudansa etcetera, e kompania ta ofresé e pasaheronan ku nan por bai Aruba riba un otro buelo ku un otro kompania, pues manera nada no a pasa. Mas ku klaro tabatin hende ku mester a yega kas a bai Aruba, pero den e kaso spesífiko aki e pareha hóben aki, ku tabata den stress i morto spantá, no por a pensa di abordá niun avion mas pa e dia ei i a disidí ku nan no ke bula mas pa Aruba. Pa motibu ku nan no sa tampoko ku dia di regresá, ku kua avion nan lo bin, si ta e mesun avion atrobe.
E dia ei a splika nan, ku nan por pasa na ofisina di Aruba Air i nan lo haña nan plaka bèk.
Ora ku nan a bai reklamá nan plaka, nan a topa ku algun trahadó ku a atendé nan nan manera ta ko’i loko nan ta hasi, sin niun momentu puntra kon ta ku nan kondishon pa finalmente bisa nan, ku a ofresé nan otro buelo i ta nan mes a nenga i komo tal no tin plaka bèk.
Den nan dos nan a pèrdè mas ku 800 florin i tambe e “aiport tax”.
Te awe e pareha tin di dil ku e loke ku nan a pasa aden, kada bes e senario ta presentá den nan memoria i ta mira tur e suseso pasa atrobe nan dilanti.
Un hende no sa kiko ta pasa den un ora e ta den tal situashon i e kompania ta tuma esaki manera un suseso di tur dia, ofresé un otro buelo i dor ku no a tuma esei, nan a pèrdè nan plaka.
Desafortunadamente e kompanianan aki ta sali sin problema for di e tipo di situashonnan aki. No tin un areglo ku ta obligá e kompanianan aki paga daño i perhuisio, kisas solamente entamá un kaso hudisial ku lo kosta plaka pa entamá.
Ora un kompania europeo tin retraso ku a perhudiká su pasaheronan, e kompania ta paga un suma di plaka ku nan ta obligá di kumpli kuné.
Den e kaso spesífiko aki, ora e pareha a bisa ku nan no ta kla pa bula e mesun dia ei mas, Aruba Air a tuma e bon ku nan a haña pa kome algu bèk for di nan.
