WILLEMSTAD.- Awe ta ofisialmente e promé dia di skol. Manera a keda informá den un konferensia di prensa djamars último, Minister di Enseñansa Cithree Van Heydoorn a indiká ku tur skol na Kòrsou lo risibí sufisiente produktonan higiéniko pa asina por habri aña eskolar trankil i kumpliendo ku tur e protokòlnan di higiena ofisial. Pero no ta tur skol a risibí esaki.
EXTRA a risibí informashon di sigur tres skol ku no a risibí nada di produkto higiéniko.
Aparte di esaki tin otro skolnan ku a risibí algun produkto higiéniko ku probablemente lo kaba den e promé siman di skol mes.
Pues probablemente sea no tin sufisiente sèn pa hasi esaki, òf no a kaba di atendé ku tur skol manera a keda primintí.
Te ku ayera tardi na momentu ku EXTRA tabata na un di e skolnan en kuestion den área di Brievengat, ainda nan no a risibí nada.
Un di e dosentenan a indiká na EXTRA, ku apesar ku (ainda) nan no a risibí produktonan higiéniko pa nan skol, nan mes ta purba kumpli ku esaki i kuida nan mes i nan alumnonan segun forsa. Pendiente di por risibí esaki di forma sufisiente pa henter nan skol.

LAGA UN KOMENTARIO

Please enter your comment!
Please enter your name here