Kuida Kurpa…kiko ta Kuida Kurpa. E ta muchu mas ku tene kuenta ku salú, pa bo kuida bo kurpa.   ta kuminsá próksimamente ku un sekshon den EXTRA di Kuida Kurpa. I el a splika nos kiko por spera di dje den e sekshon den EXTRA.

Kuida kurpa, un ekspreshon…

 

Vanessa a splika Djasabra ku Kuida Kurpa ta un ekspreshon na papiamentu ku nos tur ta usa ku hopi frekuensia pero ora kombersá ku hende kiko e ta nifiká pa nan, kada hende ta duna otro nifikashon. Tin hende ta bisa ku tin di kuida kurpa den sentido literal i tin hende ta papia di bai poko poko, ‘rustig’ no hasi nada ku ta perhudiká bu. E definishon ta hopi amplio. Ora hasi pregunta na diferente hende kiko e ta pa nan, mayoria hende ta wak’ e komo algu mas amplio pa kuida nan mes, pa protehá nan mes di un forma ku nan ta bon. Sea ta hasié pa bo mes, òf dese’é na otro hende. Bo por bai hopi leu pero en general nos por mir’é komo e bienestar di nos komo ser humano, Komo e pakete kompleto ku ta enserá e ser humano ku ta e parti físiko, i tambe e parti emoshonal, spiritual, diferente área ku por tira bista òf pone atenshon riba dje.


E wil di bida…

Na ingles segun Vanessa ora ta papia di kuida kurpa, ta papia di ‘Self Care’ i ora lesa buki i buska riba Internet mas informashon, nan ta deskribí e parti di ‘Self Care’ i konekt’é ku diferente área por ehèmpel e ‘The Wheel of Live’. Kada hende ku ta papia di e tópiko aki, ta identifiká algun variashon den e ‘wheel of live’, pero por lo general entre 6 pa 12 diferente área ta pone atenshon riba dje.

E konsientisashon…

Kuida Kurpa ta hopi amplio. E ta bai pa e konsientisashon ku nos tin pa kuida nos mes. En general komo ser humano nos ta pensa ku hopi kos ta pasa nos, nos ta biba den e eksperensia ku ma bira malu, haña aksidente di outo, kome un kuminda ku e kai malu na stoma i ta mira ku kos a pasa nos i hopi bia ta asina i no por evitá ni kontrolá tur kos ku ta pasa bu riba un base diario. Pero tin vários kos ku bo mes por influensiá si pa evitá ku esei ta pasa bu. Un ehèmpel práktiko ku Vanessa ta ku si bo tin un sita i bo ta sali kas 10 minüt promé, e persona ta kore outo ku un spit diferente ku si el a sali kas mei ora promé. Si sali 10 minüt, e ora ta pèrta i bo ta ‘rush’ i ku e chèns ku algu por pasa kaminda si bi tabata mas tempran bo t mas trankil. Si wak e parti di nos mes komo ser humano, si mi ta konsiente ku 8 ora di soño ta duna mi kurpa e trankilidat ku mi mester pa funshoná bon siguiente dia i ta konsehabel pa mi pone atenshon na esei pasobra si mi sa ku si mi drumi 3 pa 4 ora pa anochi, e siguiente dia mi no ta funshoná na nivel. Esei ta algu spesífiko ku bo por pone atenshon na dje pa bo mes. Esakinan ta djis ehèmpelnan kon e hende mes por tuma kontrol riba kada aspekto di bida i wak kiko e persona mes por hasi pa hasié mihó pa e mes. E benefisio ta pa e persona mes pasobra mas mihó bo kuida aspektonan di bo kurpa, mas trankilidat, goso bo tin i mas bo ta logra e metanan ku bo ke logra tur dia. Esaki pasobra e bida ta mas relahá i ménos strès kompará di ku riba hansha.

 

Un karta na mi mes…

Kuida Kurpa ta un buki ku Vanessa a kuminsá skibi algun aña pasá. Tabata un karta na su mes, eksperensianan di bida ku el a pasa i ku el a sinti falta di mas guia i informashon kon pa kana e kaminda. El a hañ’é den situashon ku diferente famia malu i el a bai kuida pa nan. Den su entusiasmo i amor pa kuida nan el a lubidá di kuida mes tantu i mes bon e mes. I esei ta trese kuné ku tin dia bo ta mustra hopi kansá. Un hende ta ripará esei fásilmente. E por trese kuné ku bo por lubidá kisas un afsprak pasobra bo ta kansa. Vanessa a kuminsá wak den spil i buska un formulá mihó pa e balansá e parti di kuida otro i kuida su mes. Si e no hasi esei pa su mes, e lo frustra un tiki den e parti di konstantemente ta kuida otro hende pero no ta logra e satisfakshon ku su mes metanan ta bai dilanti. I tiki tiki el a kuminsá buska pa su mes e kaminda. Kiko ke men Kuida Kurpa? I asina Vanessa a bai lesa bukinan di lesa bo mes i el a bira mas konsiente di kiko tur e áreanan ku e tin di pone atenshon na dje. Tambe Vanessa a siña pa wak e áreanan ku mas trankilidat i mas ophetivo en bes di wak kosnan ku emoshon.

No fásil…

No ta kos ku ta bai di un dia pa otro segun Vanessa. E ta sinti ku awor su kabes ta mas balansá, e ta mas konsiente di kada área i tin áreanan ku ainda e no ta satisfecho kaminda e ta. E ta kere ku a tum’é algun aña pa e yega einan. E parti di simplemente realisá ku e situashon ta manera e ta, e parti di laga un tiki bai na e parti emoshonal, dor di emoshoná ku kada tópiko a tum’é un tiki pa e yega einan. Ora bo ta hopi kansá ta difísil pa bo pensa mas trankil. Awor e kaminda tin su ‘ups and downs’, pero Vanessa ta sintié mas den balansa ku e por wak ku un brel glas limpi, wak rondó di dje i traha riba e áreanan ku e ke traha ariba.

 

Temanan di atenshon…

Den su vershon di Kuida Kurpa, Vanessa a skohe 8 tema di atenshon. Loke e ke bai ofresé ta pa kada luna pone atenshon na un área i durante di e luna ei dor bia lo kompartí un tiki informashon di kiko e tema ta kontené i duna algun teps i ehèmpelnan kon por fortifiká e área ei di bo bida. Por ehèmpel si ta papia di bo parti físiko, esei so ta un kapítulo riba su mes. E parti físiko ta kontené moveshon, kiko ta kome. I pa e parti físiko e hende kisas ta move i no ta kome bon i e lo purba amplia mas tantu posibel kada área di e tópikonan ku ta trata pa asina kompartí tepnan pa e públiko ku ta lesa i skucha nos.

 

Para ketu na bo mes…

Vanessa ta kere ku mester konsientisá hende. Mas e papia ku hende, mas e ta ripara ku nos no ta para ketu na nos mes, kiko den e área ei ta bai hopi bon i ku nos ta satisfecho kuné i kiko den e área ei lo mester hasi mas esfuerso pa mihó resultado. Djis konsientisá i pone hende reflekshoná un ratu ta un paso kaba i sperando ku lo tuma akshon pa e kos ku abo ke logra.

 

E buki…

Vanessa tin algun aña bezig ku un buki. Den promé instante el a kuminsá skibi manera ta un karta e ta skibi pa su mes. E ta sinta tras di kòmpiuter i ta djis skibi i skibi bai gol. Pero aña pasá el a partisipá na un tayer pa hendenan ku ke skibi buki i einan el a ripará e trikinan kon pa hinka un buki den otro i pone e kontenido pa e ta balor agregá pa otro i ku ta bo historia. Awor aki e ta trahando mas organisá i e intenshon ta pa aki un aña e buki ta sali otro aña Vanessa ta hasi 50 aña i el a pensa ta un bon regalo pa e duna su mes simbólikamente. E ta un guia pa e mes, i ta e buki ku e lo a apresiá pa tin akseso na dje na momentu ku e tabata ful den un káos. Esaki ta un kompromiso ku su mes i un regalo pa otronan.

 

Kompartí konosementu…

Kuida Kurpa ta kuminsá den EXTRA i tambe e lo bai radio pa asina tin un programa breve riba kuida kurpa. I banda di radio e ta bezig kaba riba media sosial, un página di Kuida Kurpa mes ku ta Facebook i Instagram i ta bezig pa plania pa bai televishon. Vanessa a enfatisá ku den promé instante el a kere ku ta e so a pasa den e kaminda di desórden pa órden. Tin bia hende ta pasa den algu ku ta brua e bida un tiki i e hende tin di haña e kaminda bèk den órden. Segun e tabata kombersá ku hende di e tópiko, el a ripará ku otro hende tambe tin e desórden ei pero e no tin bèrgwensa di papia riba algu ku no a bai perfekto pero ku bo ta drecha bèk. E ta trese kuné ku bo ta toka hopi hende su kurason. Si e por logra di haña mas klaridat i trankilidat riba su kaminda, e ta mir’é komo un responsabilidat pa kompartí e konosementu ei ku otro hende ku tambe tin algu na e kontenido.

 

 

 

 

LAGA UN KOMENTARIO

Please enter your comment!
Please enter your name here