No tin Curaçao North Sea Jazz Festival na 2020

FBI i MOJO lo bai deliberá riba futuro di e festival

WILLEMSTAD.- E aña aki Kòrsou lo no tin e gran Curaçao North Sea Jazz Festival. Organisadónan Fundashon Bon Intenshon i Mojo Concerts a disidí ku pa 2020 lo tin e festival aki. E motibu prinsipal ta debí ku te na e momentunan aki den febrüari 2020 ainda no a haña artistanan grandi, di renombre mundial, manera nan a kustumbrá e públiko ku ta bishitá e festival tur aña.

E organisashonnan ta splika ku a disidí pa wanta un ratu mirando ku pa mantené e evento na un nivel tòp mester tin dos ‘headliner’ di taya. Ku otro palabra dos artista super grandi i ku preferiblemente no a yega di aktua na Korsou ainda. CNSJ den último lunanan tabata hopi aktivo buskando kandidatonan pero e lunanan tras di lomba a demostrá ku den sèptèmber 2020 lo no tin ‘headliners’ disponibel. Pues meskos ku na 2017 a disidí pa wanta un ratu ku e festival.

Interesante ta ku Fundashon Bon Intenshon i Mojo Concerts ta indiká ku nan ta bai delibera riba futuro di e festival!

Na 2010 Korsou tambe, meskos ku Rotterdam algun aña prome, a konosé su prome North Sea Jazz Festival. Yegando kasi 10 aña di eksistensia e festival aki a trese artistanan grandi ku hinter e region di Karibe i Sur Amérika ta yalurs di dje. Nòmbernan manera Stevie Wonder, Earth Wind and Fire, Prince, Bruno Mars, Lionel Richie, John Legend i no lubidá un Oscar de Leon i Juan Luis Guerra.

For di un prinsipio a indiká ku ta organisá e festival den un periodo ku normalmente práktikamente no tin moveshon i nos turismo ta morto. E festival su meta prinsipal ta pa atraé turistanan pudiente bin disfrutá di un festival di e nivel mas haltu pa loke ta trata músika i na mes momentu konosé i disfrutá di Kòrsou su bunitesa. Di e forma ei ekonomia ta drai. Tur aña University of Florida ta hasi investigashon pa generá datos i tur aña di nobo por lesa ku tur bishitante ta haña Kòrsou bunita i e festival ta tremendo. E loke turistanan ta gasta tur aña ta subi pero loke semper ta keda atras ta ku aparte di e festival no tin muchu mas pa kapta i tene atenshon di e turistanan. Pues pa 2020 no tin Curaçao North Sea Jazz festival.

SHARE

LEAVE A REPLY