WILLEMSTAD.- Proyektonan di infrastruktura ku ta importante pa Bándabou ta mustra di ta pegá. Algun di esnan mas importante ku por menshoná ta e kaya nobo ku mester konstruí via Bullenbaai ku ta duna alivio pa e tráfiko ku ta bai i sali for Bándabou. Otro proyekto importante ta e kaya ku ta bai pa Sta. Martha kaminda e kompania TUI ta konstruyendo un resort turístiko grandi.
Miembro di e organisashon VIBA, Tirzo Petroudis den deklarashon pa EXTRA ta bisa ku bèrdat tin hopi aña kaba ta papia di un kaya ku mester pasa via di Bullenbaai komo alternativa pa e tráfiko di i pa Bándabou, pero ku te ainda nada a sosodé. Segun EXTRA por a komprondé asta den seno di Obranan Públiko ta ketu relashoná ku planifikashon pa e proyekto aki. Meskos ta konta tambe pa e kaya ku ta bai Sta. Martha, esta ku no tin planifikashon tumando lugá pa e proyektonan aki.
Petroudis ta bisa ku e desaroyo na Sta. Martha ta importante pa ekonomia na Bándabou. VIBA mes a yuda promové e proyekto pasobra esaki ta trese kuponan di trabou pa habitantenan. Ta den kuadro di e proyekto aki tambe mester a drecha e kaya ku ta bai Sta. Martha, pero te ainda no ta mirando moveshon pa kuminsá ku e trabounan aki, e ta bolbe enfatisá.
Deskriminashon
Papiando mas aleu riba título personal di e proyekto di TUI, Petroudis ta bisa ku tin kosnan ku e no ta di akuerdo kuné. E ta indiká ku dia TUI a tene seshonnan di informashon riba nan proyekto na Sta. Martha a splika ku e playa eksistente na Sta. Martha ta keda habrí pa públiko, pero ku TUI ta bai konstruí un otro playa artifisial ku ta eksklusivamente pa klientenan di e resort. Pa Petroudis esaki ta un forma di deskriminashon.
Na su opinion tur parti di kosta di Kòrsou mester keda liber aksesibel pa poblashon. Pues, no mester importá si un desaroyadó konstruí un playa artifisial na un parti di e kosta. Esaki mester mester keda aksesibel.
“Mi ta kontra di esaki. E ta un forma di ‘apartheid’. Na Sur Afrika mes a eliminá apartheid mas ku 30 aña pasá i no por permití ku awor ta kuminsá ku tipo di aktonan similar na Kòrsou.”
Petroudis ta bisa ku el a trese su opinion riba e punto aki dilanti den seno di VIBA. E ta haña ku e organisashon mester a sali mas fuerte den publisidat kontra e plannan aki. “Pero, al final ta direktiva ta disidí i mi ta respetá esei.”
Finalmente Petroudis ta suprayá ku ta riba título personal e ta trese su punto di bista dilanti.
