WILLEMSTAD.- Investigashonnan riba integridat mester ta di tal manera dirigí ku e transparensia, seguridat i kalidat ta garantisá. Ku otro palabra, mester tin sufisiente personal di kalidat pa por hasi investigashonnan di integridat i konsehá Minister di Hustisia. Asina e rapòrt riba maneho di e Ofisina pa Asuntunan Interno (BIZ) ta bisa. Pero den práktika ta resultá ku e kantidat di personal repartí den BIZ ta riba e formashon stipulá, ku ta un hefe i sinku kolaboradó.

E hefe di kuerpo i di BIZ ta duna di konosé ku mayoria di miembro di personal di BIZ promé ku nan entrada den e ofisina aki tabata envolví ku otro timnan di investigashon di Kuerpo Polisial Kòrsou. Dor di esaki nan tin sufisiente eksperensia den hasimentu di investigashonnan (penal).

Mas aleu e rapòrt ta bisa ku e tim di maneho ta ‘screen’ kada kolaboradó promé ku nan bai traha pa BIZ. E proseso di ‘screening’ ta konsistí prinsipalmente di kompilashon di informashon (interno) rònt dje kolaboradó serka e hefenan korespondiente.

Na kabes di e sekshon di Asuntunan Hurídiko di KPC tin un hurista ku ta sostené i konsehá e maneho di KPC. For di Ministerio di Hustisia ta bin sali na kla ku empleadonan di e ministerio aki no ta ser envolví den atendementu ku e proposishon di kastigu. Por ehèmpel, Minister di Hustisia no ta ser konsehá riba esaki dor di kolaboradó di su ministerio, entre otro pa motibu ku no tin proseduranan deskribí.

Proseso i prosedura:

Pa garantisá e transparensia, kalidat i derechonan di empleado polisial mas tantu posibel mester ehekutá investigashonnan di integridat di akuerdo ku e proseso i proseduranan preskribí. Segun e hefe di BIZ, e ofisina aki ta mantené su investigashonnan i prosesonan den kuadro di e plan di KPC.

E ofisina ta tuma kehonan, ta evaluá esakinan i despues ta hasi e investigashonnan. No tin prosedura, KPC tin un “Manual pa Investigashon” den konsepto i den kual e proseduranan pa BIZ ta ser deskribí. Tur prosedura mester ser registrá. Un registro na drechi ta di sumo importansia pa kontròl dje tempu ku transkurí. Ademas BIZ mester disponé di un bon sistema digital pa monitòr e términonan i pa por saka informashon di maneho for di e sistema.

Na momentu dje investigashon aki BIZ tabata registrá tur keho den Excel. E departamento di Asuntunan Hurídiko tambe tabata registrá e kasonan ku BIZ a terminá den Excel. Pero e programa aki no ta monitòr e término di tempu pa konkluí un investigashon i pa tuma medidanan disiplinario. Pero segun BIZ a start ku un trayekto pa introdukshon di un sistema di registro nobo.

LAGA UN KOMENTARIO

Please enter your comment!
Please enter your name here