WILLEMSTAD.- Lei no ta stipulá un máksimo pa loke ta edat pa un persona tin un reibeweis. Solamente, personanan di edat haltu i ku ta trafiká riba kareteranan públiko manehando un vehíkulo, dado momentu lo tin di pasa un prueba kada sinku aña pa sa si nan ta kapas ainda pa manehá un vehíkulo. Esei EXTRA por a komprendé for di splikashon di funshonarionan di Departamento di Reibeweis resientemente. Sra. Ruthline Haddocks den su kalidat di hefe di Asuntunan Públiko a splika ku komo dos aña pasá a introdusí un areglo ministerial i esaki ta bisa ku na momentu ku un persona kumpli 80 aña òf mas, tin di pasa un prueba promé pa por evaluá si e ta apto pa ta riba kaya manehando un vehíkulo. Pues, personanan di edat lo no haña un prolongashon outomátiko ora nan reibeweis ekspirá. Nan lo mester por demostrá ku nan ta kapas pa sigui manehá i si e persona pasa e prueba bon, lo haña su reibeweis pa sinku aña. Pues, reibeweis no ta mará na ningun edat máksimo.
T’asina ku e siman akí gobièrnu a anunsiá ku entrante aña 2026 lo bira posibel pa esnan ku ta deseá por pasa nan eksámen práktiko di reibeweis ku un outo ‘automatic’, pues outo standart no ta obligatorio mas. Solamente e lo tin su (des)bentahanan, den e sentido ku koriendo ku outo ‘automatic’ lo bo no tin mester di pasa ‘speed’ mas, pero di otro banda si ta reibeweis pa ‘automatic’ so bo tin, bo no por subi kaya ku outo standart. E lo ser konsiderá komo un infrakshon i bo ta kore e riesgo di haña but. E reibeweis nobo pa ‘automatic’ lo tin e mesun periodo di balides, ku ta 5 aña.
Pero tin mas pregunta ku ta surgi rondó dje tema akí di reibeweis ‘automatic’. Ta puntra si e eksámen di teoria ta keda meskos, i nos a komprendé ku esei ta e kaso. Èksamen no ta hasi diferensia riba bo korementu riba kaya, ya ku kada ken ku ta riba vianan públiko mester ta na altura di e reglanan den tráfiko, i den e kaso akí di leinan nobo di tráfiko. Tin un parti di e eksámen ku ta enserá preguntanan ku no ta a base di lei nobo, pero na momentu di pasa eksámen práktiko, pues ora di kore, i bo topa ku bòrchinan nobo ku ta pará den e lei di aña 2000, bo mester por konosé nan.
Pero tin den tapara tin diferente proyekto pa bini ku kambionan na e departamento di reibeweis, pa dje forma ei e funshoná optimal manera debe ser i duna e servisio manera mester ta tambe. Den kuadro di digitalisashon, e ministerio di BPD ta sigui avansenan teknológiko, i e parti teorétiko di eksámen di reibeweis tambe lo forma parti di dje.
