Tyshaini Bruno; Nos mes ta hasi un diferensia entre yu di Kòrsou
Algun siman pasá, djasabra a publiká un entrevistá ku un di nos hóbennan yòn profeshonal na Hulanda: Tyshaini Bruno. Algun luna pasá, Tyshaini a gradua ku un 8.5 pa su master tésis di Sosiologia na Vrije Universiteit, ku e tópiko di Inklusividat i Diversidat. Den su investigashon, el a enfoká riba e bareranan ku hulandesnan no europeo ta enfrentá miéntras nan ta biba i traha na Hulanda. E publikashon di djasabra a risibí hopi bon komentario i atenshon. Ta asina ku Djasabra no a logra inkorporá tur e rekomendashonnan ku Tyshaini a formulá den su tésis. Hopi hende a pidi pa e bai un tiki mas profundo, pa splika e rekomendashonnan prinsipal i kon nan ta relashoná ku Gemeente Amsterdam.
Djis pa refreská un tiki, e entrevistá anterior: Tyshaini a splika ku su investigashon, ku tabata forma parti di su master, ta basá riba e situashon aktual na Gemeente Amsterdam. E meta tabata pa evaluá kuantu e pólisa di diversidat i inklushon ta realmente protehá i representá e grupo di Hulandesnan ku no ta di orígen Europeo.
Rekomendashon pa Gemeente Amsterdam
Segun Tyshaini, e promé rekomendashon pa Gemeente Amsterdam ta ku nan pólisa di diversidat i inklushon no por keda na un nivel amplio kaminda tur hende por skohe. Den e forma ku e pólisa tabata skibí, e ta konsistí básikamente di algun frase general ku ta duna e direktiva e oportunidat pa skohe kon nan ta implementá e regla. Esaki ta laga hopi espasio pa interpretashon personal, ku ta nifiká ku kada lider òf departamento por implementá e pólisa na su manera, segun su pensamentu.
E manera ei, e pólisa no ta yuda efektivamente e grupo di hulandes ku no ta di orígen europeo. Pa evitá esaki, Tyshaini ta rekomendá ku e pólisa no mester keda desentralisá, sino mas bien sentralisá. Tur direktiva tin ku sigui e mesun kriterio. Den e forma ei, tur departamento ta kana riba un liña, i lo bira mas fásil pa midi i evaluá si e pólisa ta funshoná realmente. Tyshaini ta konsiderá esaki un di e rekomendashonnan di mas importante, tantu di su tésis pa ku Gemeente Amsterdam.
Invertí den liderazgo
Ademas, Tyshaini a rekomendá Gemeente Amsterdam ku mester hasi un invershon fuerte den liderazgo. Na e momentu akí, na nivel mas haltu di liderato, tin masha tiki hulandes ku no ta di orígen europeo. Esaki ta nifiká ku ta hopi fásil pa tur lider tin mesun forma di pensamentu, norma i balor, kriterionan ku no ta skibí den dokumento, pero ku ta forma parti di nan mentalidat.
Un ehèmpel ku Tyshaini ta duna ta ku hulandes ta pone hopi enfoke riba aksènt. Un persona ku tin un aksènt por keda atras den su posibilidat di desaroyo i krese den su trabou. Si tur lider tin e mesun balor i persistensia riba esaki, e chèns pa e persona logra un promoshon ta bira hopi mas chikí.
P’esei, e konseho di Tyshaini ta pa duna entrenamentu spesífiko di liderazgo. Esei lo no kambia e situashon di awe pa mañan, pero por lo ménos e lo yuda ku nan lo bira mas konsiente di nan akshon inkonsiente. Ta kosnan ku bo no ta pone riba papel, pero ku ta influensiá e desishonnan ku bo ta tuma. Den e mesun rekomendashon, Tyshaini ta sugerí pa kuminsá krea un espasio pa kòmbersashon habrí riba norma i balor ku no ta formalisá. Tur hende mester haña e libertat di bisa kiko nan ta sinti. Entrenamentu di diversidat di kultura por kontribuí hopi na esaki dor di duna espasio pa hende konta nan eksperensia propio.
Na Hulanda, por ehèmpel, tin hopi muslim ku ta biba ku nan kultura i tradishon. Hopi hulandes europeo no ta hopi familiar ku esaki. Pa evitá ku tur kos ta bira un barera entre komunidatnan diferente, Tyshaini ta insistí ku nos mester ta mas habrí i dispuesto pa siña.
E meta ta pa evitá ku lidernan ta keda mara norma i balor na kriterio ku no ta relevante pa un trabou. E kriterionan esensial mester keda bon deskribí ku ta e tipo di estudio, e eksperensia profeshonal, e kualidat ku e posishon ta pidi. No por bai agregá kos ku no tin nada di wak ku e posishon mes. Segun Tyshaini, esaki ta e punto esensial pa logra mas inklushon den e sistema.
Ban sera huntu komo komunidat
Aparte di e rekomendashonnan pa Gemeente Amsterdam, Tyshaini ta pone enfoke tambe riba nos mes, spesialmente hendenan ku no ta hulandes europeo. Segun e, nos mes ta hasi un diferensia entre yu di Kòrsou ku ta biba na Hulanda i esunnan ku ta keda biba den Karibe. Pero, e realidat ta ku hopi hulandes europeo no ta mira un distinshon, nan ta persiguí nos manera un solo grupo.
Komo sosiólogo, i basá riba e investigashon, Tyshaini ta bisa ku en bes di nos mes traha diferensia òf bringa kontra otro, nos mester sera huntu komo komunidat. Nos tur ta eksperensiá bareranan similar, aunke e grado òf e intensidat por variá. “Ta esensial pa sostené otro,” e ta bisa.
E di dos rekomendashon di Tyshaini pa hendenan di Kòrsou ta pa no warda riba oportunidat, bai buska nan. No solamente na Hulanda, pero den tur parti di mundu. Si bo mira un inisiativa, bai tras di dje. Oportunidat no ta yega para dilanti bo porta, tin bia bo mes mester krea e kaminda pa e porta por habri. Esaki ta un mensahe hopi importante pa nos hóbennan profeshonal, nos mester stòp ku e timides. Tyshaini ta insistí ku “Ta bo mes tin e responsabilidat di forma bo futuro.”
Importansia di konekshon sosial
For di e investigashon a komprobá tambe ku nos mester traha riba nos ‘netwerk’, konekshon sosial. Tyshaini ta indiká ku den su konekshon sosial di yu di Kòrsou, hopi e ta tende bisa ku nan no ta klek asina fuerte ku hulandes europeo, i ku nan ta preferá krea relashon mas den nos propio komunidat. Su konseho ta pa preservá esaki, pasó e ta un manera pa tene bo identidat i kultura bibu. Pero na mesun momentu, e ta enfatisá ku bo no por lubidá ku bo ta biba den un pais eksterior i ku diversidat ta esensial pa bo éksito. Si bo ke yega leu, bo mester mustra interes pa krea konekshon ku otro grupo. Por ehèmpel, “si bo tin un kolega hulandes europeo, nunka bo no sa ki tipo di oportunidat e konekshon ei por habri pa bo. No ta nesesario pa bira mihó amigu, pero e konekshon sosial por yuda yega hopi mas leu den bo karera.”
Un di e puntonan primordial ku Tyshaini a pone dilanti den su tésis ta ku konekshon sosial a buta hopi hende den posishonnan haltu. Na Rotterdam, por ehèmpel, nan a kuminsá inisiativanan sosial kaminda hende ku tin disleksia por krea konekshon ku otro. Tur luna nan ta reuní, nan ta risibí kursonan, òf simplemente bai na un ‘borrel’ pa konektá. Na e manera akí, bo por konosé hende nobo i tende di oportunidatnan ku normal bo no lo tende.
Invertí den idioma: un arma ku niun hende por kita for di bo
Ademas, Tyshaini ta rekomendá pa nos kuminsá invertí den nos idiomanan. Hopi biaha nos tende hendenan ta bisa: “mi ta dominá papiamentu, hulandes, ingles i spañó”, i nos ta broma ku esaki. Pero, manera e ta bisa, esaki no ta solamente un bromamentu, e ta un luho i un punto fuerte di nos. Geográfikamente nos ta situá na un punto kaminda nos ta risibí influensia di tur sorto di nashonalidat, i esaki ta habri posibilidatnan úniko.
Segun Tyshaini, loke hopi bia nos falta ta dominá un idioma na un nivel haltu, ku bo por us’é ku seguridat i profeshonalidat. “Konosementu ta un kos ku niun hende no por kita for di bo,” e ta bisa. “Nan por purba kibra bo, pero si bo tin bo idioma fuerte, esaki ta bo arma pa keda para duru.”
E rekomendashonnan akí, segun e, ta partikularmente esensial pa nos hóbennan ku ta bai studia na Hulanda. Usa tur oportunidat pa fortalesé bo idioma. Idioma ta bo promé entrada den bo karera profeshonal. E ta enfatisá ku idioma i konekshon ta dos kos ku ta bai man den man. Ora bo ta bai kore stazje, no solamente bo ta dependé di bo kapasidat akadémiko, pero tambe di kon bo por komuniká i e klase di relashon ku bo por krea. Idioma ta e yabi pa por krea konekshon.
Duna bèk na bo komunidat
Tyshaini ta bisa ku e tin un sírkulo di amistat i ku e ta purba mantené un relashon dor di duna i risibí konseho serka nan. Segun e, esaki ta un manera pa sigui krese personal i profeshonal. Tambe e ta konta di un inisiativa ku el a kuminsá ku e nòmber ‘Taal op Niveau’. Aunke na e momentu aki e no ta tan aktivo pa motibu di trabou, e plataforma tabata sirbi manera un espasio kaminda hende por manda nan karta, tésis òf dokumento pa risibí asistensia ku idioma. Ku esaki, Tyshaini a topa manera di duna bèk na komunidat i sostené otro hóben ku tin mester di yudansa riba e parti di idioma.
Ambishon pa futuro
“Sky is the limit,” ta loke Tyshaini a enfatisá. E no ta kere den limitashon personal. Den su trabou aktual, e ta dediká su dianan na investigá i prevení froude, i sigurá ku tur kos ta kana segun lei, kriterio i standartnan. Pero su ambishon ta bai mas leu ku un trabou. Tyshaini ke duna un stèm na grupo mas vulnerabel den komunidat, i ku esaki e ke kontribuí pa krea un sosiedat mas hustu I inklusivo kaminda tur hende por ekspresá nan mes.
E hóben no sa di oportunidatnan den su pais
Un di e motibu simpel ku Tyshaini ta menshoná ta ku hopi hóben no ta na altura di e oportunidatnan ku Kòrsou por ofresé, prinsipalmente pasobra e informashon no ta keda publiká via e plataforma ku nan ta usa mas. E falta di konekshon sosial tambe ta stroba hopi oportunidat, sin kontakto bo ta keda ménos visibel. Segun e, awor ku mas oportunidat di trabou ta sali riba medianan sosial, e ta mas transparente, di kual por yuda inspirá mas yu di Kòrsou pa bolbe i kontribuí na e komunidat. Otro motibu ta ku hopi hóben ta preferá keda biba for di Kòrsou pasobra nan ta haña mas oportunidat. Aunke tin oportunidatnan, pero si nos wak e sifranan di funshonnan alto, solamente 1.3% ta keda ehersé pa hende ku no ta hulandes europeo, un señal ku te ainda tin un plafòn ku ta limitá kaminda bo por yega. Segun su investigashon enkontrá den trabounan gubernamental, diversidat ta pone limitashon na bo desaroyo na un nivel mas haltu.
Tyshaini ta bisa pa nos ‘think bigger’, kambia nos mentalidat, krea e kaminda i sosten nesesario pa nos hóbennan por kontribuí i pa Kòrsou bira un komunidat mas salú i inklusivo.
Un siudat diverso
Tyshaini ta splika ku loke a hasi e mas konsiente ta ku su investigashon ta basá riba e siudat di Amsterdam, un di e siudatnan di mas diverso na Hulanda, kual lógikamente bo ta spera di mira ku diversidat ta keda reflehá den posishonnan alto. Pero e resultadonan a mustra ku, apesar di e diversidat grandi di e komunidat, esaki no ta keda representá den nivel di liderazgo.
E ta agregá ku si Amsterdam, ku su populashon grandi i mesklá, por mira un sistema ku ta limitá hendenan ku no ta hulandes europeo, e posibilidat den otro siudat ku ta ménos diverso, e situashon di inklusividat lo ta aun mas ménos. “Amsterdam a surpasá tur nivel di diversidat, pero ainda e resultadonan ta mustra un realidat ku ta pone bo pensa. Esaki ta nifiká ku e no lo ta un shòk si otro siudat ku ta ménos diverso mustra un situashon inklusivo mas preokupante,” e ta bisa.
Segun Tyshaini, Gemeente Amsterdam a tuma e investigashon na serio. Nan no a wak esaki solamente komo un estudio akadémiko, sino komo un oportunidat pa drecha nan pólisa i invertí den liderazgo ku ta representá tur komunidat. “E no tabata un trabou di mi so, sino di un tim ku ta evaluá e pólisa di diversidat. Huntu nos ta krea kosnan grandi ku, mi ta sigur, lo tin un impakto riba futuro,” Tyshaini ta terminá.
Pa logra inklusividat real, mester tin akshon ku ta kambia e struktura i habri porta pa tur komunidat.
