BUENOS AIRES, AP.- E sirio, Naizouz Baloul, kende a yega Argentina resientemente, ta kere ku presidente Mauircio Macri por hasi su plan di risibí 3.000 kompatriota realidat.
“Si e tin e yabi, kual mi ta kere e tin, e no mester duda pa habri e porta” pa duna otro refugiadonan ” e oportunidat di un bida nobo”. Asina e muhé di 29 aña a bisa na The Associated Press despues di manifestá ku e lo pidi e presidente esaki personalmente si e haña e oportunidat aki.
Baloul ta e siudat di Latakia i desde un luna pasa e ta biba ku su ruman hòmber Ibrahim den Buenos Aires kaminda e ta gana su sèn dunando lès di ingles. Un otro ruman mas a muri den e guera sivil na Siria.
Na vários okashon, e gobièrnu a anunsiá su intenshon di risibí 3.000 refugiado sirio, pero ainda no a definí ki dia lo skucha detaye di e plan òf ki dia ta ehekutá esaki. Mayoria ta pensa ku Macri lo referí na e asuntu durante su intervenshon djamars den Asamblea general di Nashon Uní.
Organismonan sivil i representantenan di e komunidat sirio no ta konfia ku e Ehekutivo ta kumpli ku su palabra i ta konsiderá ku te ainda a simplemente prolongá e Programa Sirio implementá pa e gobièrnu di Cristina Fernandes na 2014.
E plan a fleksibilisá entrada di sirionan ku ta wòrdu risibí pa famia i organismonan i risibí kas i trabou.
Miéntras e plan di Macri ta parse stanka, desena di míles di famianan argentino a manifestá nan deseo di risibí refugiadonan.
