Ana Corina Sosa, yu di e lider di oposishon venezolano Maria Corina Machado, na momento ku el a risibí e premio Nobel di Paz den representashon di su mama.
CARACAS (AFP).- “Bon pa Venezuela” tin hende ta bisa, “bèrgwensa”, segun otronan. E entrega dje premio Nobel di Pas na e lider opositor Maria Corina Machado a provoká opinionnan kontr’i otro den su pais meimei dje misterio di su biahe pa Oslo. Den e seremonia ayera na Noruega, su yu Ana Cora Sosa Machado a risibí e premio den su representashon i a bisa di ta sigur ku su mama lo yega “djis aki ratu”.
E propio Machado den un grabashon mandá pa e organisadónan a duna di konosé ku hopi personanan “a riska nan bida” pa e por a yega Oslo. “Ta hopi bon ku el a risibí e premio aki, pasobra e ta venezolano”, segun Alirio Villegas, penshonado di 78 aña, kende manera hopi venezolano no sa unda Machado ta miéntras ku tambe tin duda ku si e por regresá Venezuela. “Ta difísil pa e regresá, pero e mester hasi esei. E no por eksiliá, t’e ta dirigí nos. Si e bai, kiko nos tin ku hasi?”, el a agregá.
Pa Jazmin Briceño, dosente di 45 aña, Machado tin tur derechi pa regresá Venezuela. “E premio ta bon pa Venezuela, ta parse mi un bon paso padilanti”. E tambe ta spera ku Machado lo regresá pa sigui ku su lucha polítiko.
Gobièrnu venezolano no ta di akuerdo ku e rekonosimentu na Machado i a kritiká e organisadónan di Nobel. Chavismo a konvoká un marcha na Caracas. “Nos tin e mihó premio, e pueblo aki. “E mihó premionan ta den man di nos pueblo, ta e trankilidat ku kua nos ta biba i ku nos ta konstruí nos mes destino”, segun Diosdado Cabello, minister di interior.
E fiskal general, Tarek William Saab, dia 20 di novèmber a bisa na AFP ku si Machado bandoná e pais lo konsider’é komo “profuga” di hustisia, pues tin “vários investigashon di karakter penal” kontr’i dje. “E ta manera ladronnan, e ta bai skonde. “E no ta hasi nos falta, pues e por keda ayanan”, segun Abigail Castillo, asistente atministrativo na Caracas. “Ta un bèrgwensa hopi grandi ku nan ta entregá e premio na e señora ei kende loke e ker a hasi ta blòkia tur kos pa nos pais. E no ta meresé e premio”, el a agregá.
Ademas di esnan ku ta na fabor i kontra, tin otronan ku ta kalifiká e rekonosimentu i “supuesto negosashonnan” entre gobièrnunan di Merka i Venezuela komo un show. E venezolanonan ei ke un akuerdo i pa laga nan biba na pas. Ningun hende ta kome si Maria Corina gana un premio, nan mester sali riba kaya pa gana plaka”, segun Josmar Rodriguez kende ta un karpinté.
Presidente panameño Jose Raúl Mulino (di dos na man robes) i su kasá Maricel Cohen de Mulino (r) i e presidente argentino Javier Milei (di tres na man robes) ta saludá famianan di Maria Corina Machado (no riba e potrèt) miéntras ku e aktivista venezolano Magalli Medina ta opservá.
