‘No tin mashin pa plug tera pa kunukeronan’
WILLEMSTAD.- Kunukeronan di Bándabou ta pidi ousilio. No tin mashin di plug pa plug nan tera. Di e forma aki nan no por planta i asina maske ta sòru pa nan propio kuminda.
Norman ‘Nooi’ Girigorie, den deklarashon pa EXTRA ta bisa ku e kunukeronan ta hasi petishon na AVB (ántes LVV) pa mashin di plug, pero e mashin no ta yega e kunukunan pa plug e tera. “Segun por komprondé e mashin(nan) di plug ta dañá i no tin sèn pa drecha nan tampoko”, Girigorie ta indiká.
“E kunukeronan ta sali Bándabou bai te na AVB pa paga pa nan por risibí servisio pa plug nan tera. Pero, ora nan yega AVB no ta tuma nan sèn pasobra e mashin dui plug ta dañá i gobièrnu no tin sèn pa drecha e mashin.” E ta mustra ku tempu ta pasa sin ku kunukeronan por planta nan kunuku.
Esaki nèt awor ku situashon ta hopi difísil pa tur hende, inkluso kunukeronan. “Kosto di bida ta sigui subi, pero no tin indeksashon di salario ni di penshun di behes. Pa kolmo no ta yuda kunukeronan tampoko pa nan por haña un entrada for di nan kunuku.”
Pa e motibu aki Girigorie ta hasi un apelashon fuerte riba gobièrnu pa tene kuenta ku e petishon di kunukeronan pasobra e esaki ta hopi importante pa nan. “Ta for di nan kosecha nan mes tambe ta kome i alabes haña un entrada.”
Girigorie ta lamentá ku ta hendenan humilde ta sigui sufri di e forma aki. “Asta ora nan ke planta nan mes kuminda esaki no por pasobra mashin pa plug tera no por yega Bándabou. Un biaha mas habitantenan di Bándabou ta sali perhudiká.”
Pa e motibu aki Girigorie ta urgi gobièrnu pa ‘por fabor’ ousiliá e kunukeronan di Bándabou i si tin kunukeronan di Bándariba den e mesun situashon pa ousiliá nan tambe. Aparentemente tin un situashon atministrativo finansiero bastante fèrfelu na Ministerio di GMN ku AVB ta kai bou di dje kaminda tin diferente departamento no tin e medionan finansiero pa hasi nan trabou manera mester ta.
