WILEMSTAD.- Ta imposibel ku gabinete Pisas III ta trata un yu di Kòrsou, ku tin 20 aña ta warda riba su petishon pa un pida tereno sin por keda kla, di e forma akí. Asina Norman ‘Nooi’ Girigorie ta trese dilanti. E ta reakshoná riba akshon di Ministerio di VVRP, huntu ku polis, pa saka propietario di un negoshi ku ta hür “buggy” for di riba un tereno na Bapor Kibrá.
Girigorie ta bisa ku e invershonista estranhero a pidi un tereno tras di e mesun sitio i e si a keda kla den 1 aña di tempu. Awor el a pidi pa saka e negoshi di hür “buggy” for di e sitio pasobra e ta keda nèt dilanti di su tereno ku e ke desaroyá. “Mi no ta kontra niun invershonista estranhero, laga mi trese esei bon kla dilanti, pero ta di e forma akí gobièrnu di Kòrsou ke enkurashá yunan di tera pa nan lanta nan propio negoshi pa gana nan pan di kada dia?”
Pa Girigorie e kos akí simplemente no por. “Mi ta protestá enérgikamente kontra e sistema di proseder akí di parti gobièrnu. E mesun polítikonan akí, tempu nan tabata den oposishon lo a subi kaya, protestá i hasi un bochincha kontra algu asina akí, pero awor ku nan ta den gobièrnu nan mes ta partísipe den tipo di aktonan aki.”
Girigorie ta puntra su mes kuantu di e tipo di kasonan aki mas tin di yunan di tera ku tin 10 òf 20 aña ta warda riba un pèrmit pa un pida tereno sin por keda kla, miéntras nan tin ku sinta mira kon un desaroyadó estranhero si ta keda kla den 1 aña di tempu. “Si ta asina akí kosnan a bira mi no por konkluí nada otro ku Kòrsou no ta di e yu di Kòrsou mas. Esaki ta e maneho ku tin awor.”
Girigorie ta sigui bisa: ‘E mesun polítikonan ku tabata hunga ròl i gaña ku ta defendé e yu di Kòrsou, awor nan mes ta kontra di e yu di Kòrsou. Kòrsou ta den un mundu di engaño kompletu. Na lugá ku gobièrnu ta buska un solushon pa e desaroyadó estranhero ku su proyekto, ta kore ku esun lokal.”
“Si den mi pais mi no por haña protekshon, mi no por hañ’é na niun otro kaminda na mundu”, Girigorie ta finalisá bisando.
