SEUL, KOREA (AFP).- Nort Korea a bisa ayera di ta suspendé e akuerdo di 2018 ku Sur Korea pa redusí e tenshonnan militar, un dia despues di lansamentu di parti di Pyongyang di un satélite militar, segun e agensia di prensa surkoreano Yonhap.
“Nos ta retirá dje medidanan militar tumá pa prevení tenshonnan militar i insidentenan sea riba tera, laman òf den aire, i ta koloká sòldánan fuertemente armá i bon ekipá den e zonanan di frontera”, segun e ministerio di defensa norkoreano.
“E ministerio a deklará ku e no ta laga su mes keda “frená” mas pa e akuerdo.
Sur Korea djárason a indiká ku e akuerdo ta parsialmente suspendé i ku lo tuma bèk e operashonnan di vigilansia na frontera komo reakshon riba e lansamentu eksitoso di un satélite di spionahe di parti di Pyongyang e anochi anterior.
E lansamentu dje satélite Mallingyong-1, dilanti di un sonriente dirigente norkoreano Kim Jong Un, a keda kondená pa Merka i su aliadonan, ku a tild’é di “violashon flagrante” di e sanshonnan di ONU. Nort Korea a duna di konosé ku e satélite ta den órbita i ku Kim Jong Un ya a revisá imágennan dje basenan militar norteamerikano na Guam.
Di su parti, ehérsito surkoreano a indiká ku el a drenta den órbita, pero ku ta demasiado lihé pa bisa si e ta funshoná.
