…Momentu ku Chantal Wiertz a yega na aeropuerto i a keda risibí pa minister Steven Martina i tambe e tabata huntu ku pa sra. Aysjel Maria dje organisashon di Miss Universe di Kòrsou i tambe Gionel Virginie. Foto FB di Curaçao International Airport…
WILLEMSTAD.- Ayera nos flamante Miss Universe Curaçao top 21, Chantal Wiertz a yega Kòrsou, despues di a pone nos isla den un bunita spòtlait durante su tremendo presentashon di Miss Universe djadumingu último na Miami.
Na aeropuerto el a keda risibí pa di minister enkargá ku asuntunan di ekonomia i tambe turismo sr. Steven Martina. Chantal tabata kompaña pa sra. Aysjel Maria dje organisashon di Miss Universe di Kòrsou i tambe Gionel Virginie.
Djadumingu anochi Chantal a hasi e pueblo di Kòrsou hopi kontentu ku su klasifikashon den e tòp 21 di kandidatanan pa sigui pa final dje sertámen mas kotisá di mundu, kual ta Miss Universe. Apesar ku e no a sigui pa yega final, nos ta kontentu i agradesido ku el a pone nòmber di Curaçao a zona den un kompetensia tan importante asina.
E sertámen a tuma lugá na Hollywood Floria den Seminole Hard Rock Hotel.
E loke a resaltá serka Chantal ta ku e ta outista.
Hasta un organisashon na Puerto Rico, Aliansa di Outismo, a publiká foto di Chantal riba nan página di facebook i a gradisié di por a mustra mundu ku apesar di su “defisiensia”, el a yega hopi leu i a demostrá tur hende ku ta outista òf tin otro “defisiensia” ku no tin nada pa stroba nan pa yega kaminda nan ke.
Chantal ta habri e porta pa nos aki na Kòrsou i rònt mundu komprondé ku ser outista ta un derechi igual ku tur. Un biaha mas masha masha danki pa bo tremendo prestashon.
