Shanela Isenia

Plantashon, kose i traha artesania ta loke ta konsentrá na Groot Santa Martha serka Sheanela Isenia. Hopi konosé Shanela for di su stènt den marshe di Barber tur djadumingu. Djasabra a bishita Shanela, nos a konosé su hòfi i su atalier kaminda e ta kose/drecha paña i tambe traha artesania komo suvenir di Kòrsou. E tan famoso Gloria ta bin di inspirashon di Shanela.

 

Awa di sobra…

Shanela a konta ku na 2008 el a bai lès di fundashon TAS i einan el a siña kon ta planta den bo mes kurá. Na 2006 kaba, promé di a bai siña planta na kas, nan a koba un pos den kura di kas, teniendo na kuenta ku a nota ku den e área ei tin hopi awa. For di 4 meter ya nan a haña awa i el a yega te na 25 meter ku e pos. Ke men awa tin di sobra loke ta bon pa planta.

 

 

 

Gloria…

Shanela ku e plantashon aki a bai un direkshon kompletamente diferente di loke el a siña pe. Segun el a konta nos, el a siña moda i paña na Ulanda. Shanela ta konta ku ora su yunan tabata mas chikí, e kosementu no tabata bai manera e tabata ke. Hopi kos di hasi, hopi di hiba trese e yunan. Di kosementu Janela a kambia i kuminsá traha suvenir. Esakinan e ta traha i entrega. Su promé suvenir tabata un pòpchi ku e ta kose su paña i tur e Glorianan tin kleps den kabei. E klepsnan ta traha di ritje di koló. I di einan el a bai den plantamentu. Miéntras e yunan a sigui krese, Shanela a haña un tiki mas tempu i awor el a kuminsá bek den kosementu òf mas bien drechamentu di paña. Teniendo na kuenta ku Shanela su kas i negoshi ta keda riba kaminda grandi, e ta haña bishita di hopi turista pa drecha zuèmpak. I den su plantashon e ta haña hopi inspirashon ku e ta kombiná ku suvenir. Por ehèmpel e tin un koko seku ku el a pone un yuana riba su rant i esei ta pa pone pèn aden. Esei ta un inspirashon ku el a haña den su plantashon.

 

10 aña di plantashon…

Ya kaba Shanela tin 10 aña bezig ku su hòfi. I e ta un hòfi ku e ta super orguyoso di dje. Awor aki e ta den proseso ku tur kos ta drenta otro; e bestianan di kura ta komiendo nan mes kosecha i for di nan ta haña mèst ku ta usa bèk den e plantashon. Ta un proseso ku nan tur ta probechando di dje, hende, bestia i mata. Shanela ta kria tantu konènchi komo galiña. E konènchinan ta mas bien un pronkstuk pasobra e yu di Shanela no ke pa mata esakinan. E konènchinan ta realmente di kas i tur tin nòmber. Resientemente un di nan a muri i asta un entiero el a haña.

 

Nos Kosecha i Atalier Shiscla

 

ta e fuente di entrada aktualmente pa e famia aki. Serka Janela no tin muchu problema ku temporada seku pasobra e tin pos i ku hopi awa i konsekuentemente plantashon a drei konstante.

 

Nos Kosecha; aki tin hopi palu di fruta manera granatapel, guyaba, sòrsaka, skopapel, mespel, shimaruku, apeldam Sürnam i di Kòrsou. I si esakinan ta hopi e ta bende na plasa di Barber i e ta motivá hende pa planta den nan mes kurá. I p’esei konstantemente e tin planchanan di mata pa bende i asina konsientisá i motivá hende pa planta den nan mes kura. Janela ta guia hende kon pa planta. Por ehèmpel tomati ta masha fásil pa planta. E tomati mester lastra poko abou pa haña mas rais i e ta para mas. Serka dje e chèri tomati ta esun ku mas éksito e tin kuné.

 

Aquaponics…

Loke a haña nos atenshon ta e aquaponics. I den e aquaponics aki e tin plantashon manera tayerblat ku blachinan hopi grandi. Den  un aquaponics por planta tur sorto di berdura. E berduranan ta krese hopi lihé den e aquaponics. Un aquaponics tin un baki abou kaminda tin piská Tilapia. E awa ta bai ariba pa medio di un motor ku ta manda e awa ariba. E matanan ta haña vitamina dor di e sushi di e piská. Nan ta usa awa di áwaseru den e aquaponics i no di pos ya ku esei ta pisá pa e motor.

E mulina den hòfi Nos Kosecha ta basta nobo. E mulina ta hopi bunita i pa Shanela e ta asta un adorno pa su hòfi. E ta hopi haltu i abou e ta bai te 25 meter. Mulina no ta asina usa mas na Kòrsou ya ku ta masha difísil pa haña hende pa drech’é. Pa Shanela, mulina ta ménos gastu solamente mester wak e parti di mantenshon.

 

 

 

 

E galiñanan ta keda será ora tin sekura sino nan ta kome tur e matanan di Shanela. Tur dia nan ta haña maishi i kos bèrdè pa nan kome i atardi ta piki webu salú di e galiñanan. Webu dòl hel ku hopi hende ta gusta. Shanela ku un sonrisa a konta kon largu su lista di espera ta pa kumpra e webunan aki. Ta webu di galiña salú. Shanela a konta ku aktualmente nan tin 6 konènchi. Nan ta haña hopi atenshon pasobra ta manera parti di e famia i nan tambe ta kome for di hòfi Nos Kosecha. I e sushi di e konènchi ta usa komo mèst.

 

Planta den baki…

Pa mustra ku por planta den baki, Shanela a mustra nos ku e tin palu di papaya grandi den baki. E palu aki a pari hopi papaya. Inkreibel kon e palu a buska su kaminda pa sostené su mes fuerte den e baki.

 

 

 

E hòfi…

Patras den kurá e plantashon ta bèrdè bunita. Antes tabata planta abou pero mirando e

palunan grandi ku raisnan largu a pone ku nan no por a planta abou mas. A kuminsá planta den baki. Nos a mira orégano spañó ku por bebe, kushiná i duna bestia. Spinazi, kalalú ta algu ku masha tempu nos no a ni tende di dje. Den hòfi serka Shanela ta yen. Tin un ranka di tomati basta grandi ku a sigui plama bai den tur e bakinan den e hòfi. Yerba di hole Kruitnagel tin un historia masha interesante; e ta kore ku yuana. Shanela a konta ku ora e yuana machu pasa banda di e yerba di hole aki, e holó ta keda riba dje i e bai kas bèk i e yuana muhé no ta gusta e holó i e ta kore bai for di e hòmber i e hòmber ta bai su tras i esei ta pone ku e ta kore ku e yuananan for di den kurá. Promèntè tambe tin diferente. Meskos ku Shanela ta parti mas di un kos den un baki. Por ehèmpel yerba di hole e ta planta den kasi tur baki pa asina e por saka i bende komo planchi. Loke ku Shanela nunka ta planta huntu ta promèntè ku promentòn. Esaki pasobra tin biaha un mata i e otro ta usa mesun vitamina i si esun ta mas fuerte e ta bai ku tur e vitamina i e otro no ta haña vitamina. I p’esei el a siña segun e ta planta kua mata si i kua e no ta planta huntu ku otro. Sèlder,  palu di tamarein basta grandi for di kua Shanela ta traha awa di tamarein i djèm di tamarein. E temporada di tamarein ta for di desèmber e ta flora i pa yüni e tin fruta. Lamungras, orégano i e dosnan aki kombiná ku lamunchi el a traha un pùnch di dje. E ta masha refreskante i e orégano ta masha bon pa stoma. Promèntè; ora a kuminsá planta Promèntè nan a bai Sürnam pa mira kon ta planta promèntè i a yega na un promèntè ku hopi sabor. Den hòfi tin hopi palu di granatapel. Esaki tambe Shanela ta usa pa traha djus pa bende. E granatapel por rekonosé na e kabei ku e ta saka na su punta òf si primié e tin di zona “krèsh” i esei ta indiká ku e ta hechu sufisiente.

Batata dushi tambe tin den hòfi. E batata ta kuminsá bin ariba i asina bo ta wak ku e ta kla pa saka for di tera. I ora e mata di batata dushi kuminsá flora ta indiká ku einan un batata dushi tei forma. Yambo tambe tin den hòfi, i Shanela ta bende simia di yambo. Kouseband, bembe kònkòmber salada, milon.

 

 

Palu di beròm…

A hala nos atenshon un palu di beròm ku Shanela tin den su kurá. Beròm no ta pa baña beibi so, pero asta ta bent’é den chukulati. I awor aki e ta trahando un produkto kontra di sangura ku e beròm aki.

 

Mèst e ta traha ku blachi seku, kaska di batata i esei ta brua ku tera pa planta. Tur  blachi den kurá entre otro tambe di tamarein nan ta bari pone huntu i brua esaki pa forma mèst pa tera i pa planta.

 

 

 

Den kurá nos a mira diferente pushi ta kana 

rònt. Nan ta nesesario pasobra nan ta kore ku yuana, djaka, ke men masha bon pa kria. E hòfi Nos Kosecha i Atalier Shiscla ta atraé hopi lokal i turista. Kòrda semper si yama promé na number di telefon
(+5999) 523-2633 pa asina por haña un dushi rekorido serka Shanela.

 

 

LAGA UN KOMENTARIO

Please enter your comment!
Please enter your name here