“Nos lucha i sabor di ántes”

Yadira Wall; Nostalgia i inspirashon den un buki, Homenahe na bida volúmen 3

Nos ta sera  e luna di mart aki, e luna ku nos a yama Luna di Hende Muhé i nos a papia ku Yadira Wall. Yadira a kaba di publiká su di tres buki ‘Nos lucha i sabor di bida” ku ta forma parti di un seri di Homenahe na Bida. Yadira a bisa den e promé entrevista ku nos tabatin kuné na 2020 ku e ke skibi 6 buki. I el a yega su volúmen tres di Homenahe na Bida.

Su promé buki, un inspirashon di poesia Soledat

Yadira a biba kasi 15 aña  na Ulanda i for di einan el a kuminsá skibi buki pero na ulandes. E buki tabata kontrolá pero nunka Yadira a publiká esaki. Ora el a bin biba bèk Kòrsou, algu a pone i a lanta su inspirashon pa skibi bèk. E ta duna training i un grupo di dama a pidié pa duna training i nan tabata ke pa e trata e tema soledat. Pa el a hañ’e ku e reto ei, pa e hinka Soledat den otro el a pensa kon a trese e parti aki dilanti. Kon pa konektá ku e personanan ei ku e tema soledat. Asina el a bai skibi un poesia di soledat i esei tabata su promé soledat. Ora el a skibi e poesia, e pen a sigui bai i den un temporada kòrtiku el a skibi kasi 25 poesia. I asina el a saka su promé buki ku ta Homenahe na Bida na aña  2020. Den e buki tabatin un buki ku yama Soledat i e otronan otro tema. Yadira ta kòrda ku e tempu ei ya el a lanta Fundashon Kai Mamai i el a puntra ken lo ke skibi algu. 5 persona a skibi un poesia i el a pone nan tambe den e buki.

Di dos volúmen di Homenahe na Bida ku 72 entrevista

Pa loke ta volúmen dos di Homenahe na Bida, Yadira ta kòrda ku tabata un temporada hopi drùk, debí ku el a entrevistá 72persona i a partié den kategoria. E promé kategoria ta su famia mes. Yadira a lanta den un kas ku 12 ruman i ku su mama i tata ta bira 14 i el a pensa pa entrevistá tur su rumannan pa nan tin algu di famia den e buki. El a entrevista 11 ruman pasobra un a fayesé i el a skibi sea un poesia, nan biografia òf un kuenta. E di dos kategoria den e buki tabata su amistatnan, su amiganan, konosínan ku el a traha kuné. I e di tres kategoria tabata personanan ku a nifiká algu pa Kòrsou. Esta personanan den komunidat ku ta bale la pena entrevista nan. I asina el a entrevistá 72 persona den 5 luna. El a publiká e buki aki den kuadro di su 60 aña. Den e buki tabatin hende muhé i hende hòmber.

Rèspèt pa hende muhé

Den kuadro di e luna di Hende muhé ku nos ta klousurá awe, Yadira a wak bèk kon su bida tabata i ku e kantidat di hende muhé ku el a papia kuné. El a bisa di tin rèspèt pa hende muhé. Yadira mes a bai diferente kurso i estudio i ora e para ketu e por bisa ku ta e hende muhé ta mayoria, hopi bia ta e hende muhé ke bai dilanti i ke desaroyá, e hende muhé ta esun ku realmente ke bai dilanti, para riba nan mes pia i no ke keda chiki. I p’esei e ta kontentu i orguyoso riba nos hende muhé. Loke tambe el a para ketu na dje ta e forsa di nos hende muhé. Un hende muhé ta kai, lanta i no ta keda eibou. E tin forsa pa lanta bèk i sigui. Tambe tin e parti di responsabilidat di nos hende muhé. Tin hopi hende muhé mama soltero, pero nan a lanta para i nan a traha nan so i lanta nan yunan. Nan ta keda karga nan responsabilidat te na final. E muhé ta keda stabil. Si wak e grandinan ku ta bai Kai Mamai i ora opservá nan Yadira ta mira poko hende grandi di 70 aña  bai ariba, hendenan nechi, para riba nan kurpa. Ounke kisas nan tin un ke otro defisiensia, nan tei, nechi bisti, kabei nechi peña. Nos hende muhénan ta skèrpi ounke nan edat ta subi. I esei e ta orguyoso di dje. El a bisa di ta menshoná kada bes ku nan ta dun’e speransa i un smak.

E hende muhé no ta keda kas mas

Fundashon Kai Mamai a kumpli 10 aña luna pasá. Na e kas aki manera Yadira a splika mayoria ta hende muhé ku ta bin pasa nan dia, tumando parti na aktividatnan. Tin algun hende hòmber si.Pero e ta kere e hende muhé ta mas habri pa buska lugá pa bai i no ke keda tras. Tambe nan amiganan por trèk nan saka nan for di kas. Pero tin hopi hende muhé ta partisipá na aktividatnan di e klupnan di dama na Kòrsou. Aki tin mas di 200 klup di dama, segun Yadira. I e parti ei ta tremendo pasobra e klupnan ta pone ku e hende muhé ta Sali for di kas. Trabou di kas no ta kaba nunka i p’esei no keda kas pa trabou di kas. Sali kas bai gosa i bin kas bèk i e trabou tei ainda.

Hende muhé; awor ta bo tempu

Yadira a bisa mas aleu pa loke ta desaroyo di hende muhé ku e ora e para ketu kuantu hende ta bai Kai Mamai i kuantu klup di dama tin e ta haña esei OK, tin basta moveshon.  E ta bisa semper na e hende muhé pa pensa riba su mes, tur dia disfrutá di bo dia, gosa di bo bida. Pa e hende muhé ku a yega 60, el a hasi hopi kaba. El a sòru pa famia, kria yu, kria ñetu, nan a traha duru i a yega nan momentu. Awor aki ta nan tempu pa gosa i disfrutá kada di nobo di nan dia.

Bida i sabor di ántes

Homenahe na bida volúmen 3, Bida i sabor di ántes. Yadira a bisa ku el a skibi e buki aki teniendo na kuenta ku selebrashon 10 aña Fundashon Kai Mamai. Esei ta loke a inspir’é pa e skibi i p’esei riba e kaft di e buki e tin e logo di Kai Mamai den su man. I esei ta un di e motibunan ku el a bisa di lo skibi 6 buki i ku el a kuminsá skibi na 2025 pa e buki keda kla pa e 10 anja di Kai Mamai. Na kada un di Yadira su bukinan, el a pone un meta pa e logra e buki. Esei e ta pone su dilanti pa e mantené su mes na dje. E konosé su mes, asina e start su outo ta bai e ta bai. Den e buki tin poesia, kuenta  tin diferente persona ku ta bishitando Kai Mamai ku a skibi den e buki, tin hende di Boneiru i hendenan den komunidat ku a duna nan kontribushon. Hopi di e kuentanan i poesia ta basá riba kosnan real.

Nostalgia

Yadira a konta nos ku ora e ta skibi, e ta bai hopi den su mes. E ke haña konekshon ku su paden, konekshon ku su emoshonnan i e ta bai reflehá ku su pasado. Algu ku el a keda wantá na dje ta ora e tabata chikitu i eksperensianan ku a bin dilanti. E ta kòrda su mama, tempu Yadira tabatin 4 aña i e ta kòrda bon bon kon e ta mira su mama laba paña ku washi. Su mama tabatin un “teil” di bleki, ku awa i washi den dje i yen bola di paña. Nan tabata 14 hende den kas kemen ta hopi paña pa laba. E tabata mira su mama laba paña ku washi i su mama su paña mes ta keda tur muhá. I e ‘beeld’ ei a keda den Yadira i el a ekspresá esaki den un poesia. Otro kos ta tempu e tabata bai risibí i nan tabatin forsa di klenku pafó di kas. E ta kòrda ku su mama a laga traha un bolo den forma di anker, e forma di e bolo aki. Ta shon Pe a traha e bolo di 3 liber. A midi e boka di fòrnu pa e anker por pas presis den dje. Ta kosnan ku bo ta pasa na dje ku ta manera un pelíkula ku nunka bo ta lubidá. Yadira ta gusta e parti di nostalgia, kosnan di ántes. E gusta kas yen di hende. E ta kòrda ántes no tabatin stul pa tur hende i algun mester sinta abou i otro riba stul. I e ta kòrda ku su bo sinta riba stul i bo tin di bai tualèt bo ta bisa pa niun hende sinta. Awendia bo ta haña 20 i 30 stul den kas pero e sabor di ántes no tei.

Ántes tabata regalo awor na ènvelòp

Yadira a bai bèk den pasado i a sigui konta kon dushi tabata pa haña un regalo, Por ta algu chikí pasobra ta e intenshon su tras di konta. Ora bo hasi aña, ora di risibimentu, nan tabata ansioso pa tuma nan regalo. Pero awor aki delantá ta pone un ènvelòp pintá riba e karchi di invitashon. E parti personal ei, e parti di e dushi sensashon pa habri un regalo a bai pèrdí. Pasobra e mucha kisas ni sikiera lo por gosa di e ènvelòp ku a dun’e. Hopi kos di bida a bai pèrdí i esei si ta yamer. Ora Yadira pensa bèk riba su infansia e tin rekuerdonan masha bunita.

Pa su 70 aña lo ta kla ku e 6 bukinan

For di 2020 ku su promé buki di Homenahe na Bida, Yadira a bisa di ke publiká 6. L a yega 3 i el a pone su dilanti pa ora e hasi 70 aña e tin tur e bukinan kla. Awor aki Yadira tin 65, kemen e por traha 3 buki den 5 aña, manera el a traha e promé 3 nan. Yadira ta pidi bida ku salu pa asina e por keda kla ku su bukinan. Tin bia nos ta pidi sèn, kas grandi pero tur e kosnan ei el  a haña  kaba i no tin balor mas pe. Loke tin balor awor aki pa Yadira ta bida ku salú i pa e por usa kada dia di nobo na kosnan chikí. E edat aki, ora bo ta disfrutá i apresiá kosnan chikí ta nan ta hasi bu hende i ta nan ta bo gasolin pa sigui bida.

E di kuater buki lo ta un novela

Ku e di kuater buki Yadira a pensa pa e bira un novela, un novela basá riba nos kultura. E ta keda den e direkshon di Homenahe na Bida pero den forma di un novela. Ora e mes a pensa kon pa sigui, e ta haña un novela lo ta algu leuk. I e ta spera riba su inspirashon. No ta asina asina e inspirashon ta bin. Yadira a bisa ku el a skibi e buki aki na Ulanda ora su yu mester a haña yu. Ora su yu tabata sinta na kas, el a drei wak su yu i haña un inspirashon “nos dos ta forma unu”. Esei tabata un poesia ku el a skibi spesial pa su yu. E inspirashon no ta bini ora bo ke, pero bo ta sintié. El a bisa ku tin momentu el a habri su laptop for di mainta te anochi si por a skibi nada.

Dia 11 di aprel lo regalá un buki na tur ku a skibi

Tambe Yadira a toka e parti di finansiamentu di su bukinan. El a bisa ku e tabata prepará pa su produkshonnan pero e no tabata sa ku e lo a bira asina karu. For di momentu ku e pensa di saka buki e ta prepará su mes. I Yadira ta hende di palabra i si e bisa e buki ta sali tal dia, e lo sali tal dia. I tabatin bia el a topa ku preis haltu pero e mester a sigui. E ta kontentu ku tòg el a logra e di tres volúmen. Dia 11 di aprel e lo regalá tur e personanan ku a skibi den e buki unu. I riba e dia ei na Kai Mamai di 5 pa 7 or di anochi tur hende ku ke kumpra un buki por hasié. I el a bisa ku ora bo pone meta, bai pe. No hinka bo energia den algu ku bo sa lo no logra. No gasta bo tempu pòrnada. No hasi algu djis pa siña afó pero tòg no a logr’e. Ta ora logra bo ta haña satisfakshon ku bo mes. E kuenta di kuminsá ku algu i lag’e para, no ta Yadira su estilo.

Nunka ta lat pa logra

El a bisa ku su pianan ta riba tera i e sa ki ora e ta bai i ki ora no ta bai. No ta nada kon grandi bo ta, pero si bo tin un meta pa logra bai p’e pasobra bo ta logra. Yadira a kaba su HBO ku 37 aña. Nunka ta lat pa bo logra pero bai p’e sin wak pariba ni pabou pero bai pa e lus. Dios a duna nos tur kos, selebrá pa studia, talento i ta abo mester wak kiko ta pas ku bo i bai p’e. Pa kontakto ku Yadira ta 5180749