Lo transmití tur 104 partido entre 11 di yüni i 19 di yüli 2026
WILLEMSTAD.- Na kuminsamentu di e luna akí, Nos Pais Television a firma un akuerdo eksklusivo ku FIFA pa e derechonan eksklusivo di transmishon di televishon i radio pa e Kopa Mundial 2026. E akuerdo ta konserní tur 104 partido ku lo wòrdu hungá na Merka, Méhiko i Canada for di 11 di yüni te ku 19 di yüli 2026. Pa promé biaha, e torneo lo no konsistí di 32 pero 48 pais. Esei ta nifiká ku e Mundial akí lo ta mas grandi ku nunka.
Un logro históriko
Esaki ta un logro importante pa Nos Pais Television ta e kanal ofisial pa weganan Mundial 2026. E úniko kanal na Kòrsou ku por transmití tur partido di e evento deportivo mas grandi di mundu, esta, Kopa Mundial di FIFA 2026.
Por siguí tur 104 partido, entre nan esnan di Blue Wave tambe naturalmente, ku a klasifiká pa promé biaha den historia e aña aki. Por disfrutá di e transmishonnan riba plataformanan digital, kanal 104 i 88 i tambe Nos Pais su kanal riba YouTube, su wèpsait i nan App mobil.
E torneo sigur lo ta un reto grandi pa Nos Pais Television. Transmishon di 104 partido ku presentadó- i analistanan, ku ta enkabesá pa Alexander Makaya, ta un tarea di produkshon inmenso. Nos Pais ta kla pa e reto. Riba algun dia kaminda tin tres òf mas partido ta wòrdu hungá, por opta tambe pa un transmishon ku narashon integral.
Transmishon radial
Nos Pais Television a atkerí tambe e derechonan di transmishon di Kopa Mundial pa radio i ta habrí pa bende e derechonan aki ku un òf mas partido komersial. Proposishonnan ta bon biní.
Nation Building
Nos Pais Television ta mira e transmishonnan di Kopa Mundial komo un bon oportunidat pa promové Nation Building. Ki dushi ta pa disfrutá di tur e kompetensianan huntu komo bario, skol òf grupo di amigu. Ta p’esei ta hasi un yamada na tur ku por yuda sentro di bario, skol i/òf lugánan di reunion ku pantayanan grandi i konekshon digital pa logra esaki. E kanal na su turno lo bishitá e lokalidatnan ariba menshoná durante e transmishonnan bibu di futbòl i kompartí e ambiente i dibertishon ku restu di televidente.
