…Presidente Interino di Venezuela Delcy Rodriguez…
CARACAS, VENEZUELA.- E presidente destituí di Venezuela, Nicolas Maduro, a bisa ku e ta “bon” den un mensahe publiká djasabra riba retnan sosial. Esaki ta e promé mensahe desde ku el a keda kapturá i trasladá pa Merka pa paresé den korte pa narkotráfiko.
Maduro a keda detené pa forsanan merikano durante i invashon militar riba 3 di yanüari, kual a inkluí bombardeonan na Caracas.
E ta detené huntu ku su kasá, Cilia Flores, kende tambe a keda detené den e operashon. Nan ta detené den un prizòn di seguridat máksimo na Brooklyn.
“Nos ta bon, firme, trankil i nos ta hasi orashon konstantemente”, asina Maduro a skibi.
“Boso komunikashon, mensahe, pòst, kartanan i boso orashonnan a yega serka nos”, asina el a añadí. “Kada palabra di amor, kada gesto di kariño.
Maduro ta será den un sèl sin internèt ni korant, ku akseso den patio un ora pa dia. Un fuente yegá di e mandatario a konta na AFP ku e tin pèrmit pa papia na telefòn ku su famia i abogadonan via telefòn durante 15 minüt pa dia.
No ta kla si ta su ekipo a skibi e mensahe òf aprobá e kontenido. E mensahe a keda publiká riba X i e plataforma di mensahe Telegram.
Delcy Rodriguez, ku a bira e presidente interino di Venezuela despues di kaida di Maduro, no a reakshoná riba e mensahe. Mayoria minister tampoko a reakshoná riba e mensahe.
