“Nos ta fuerte”, Nicolás Maduro a bisa for di prizòn

Èks-presidente venezolano riba un potrèt ku aparentemente a keda saká den prizòn na Brooklyn, Merka.

CARACAS, Venezuela (AFP).- E èks-presidente di Venezuela, Nicolás Maduro, a bisa riba su retnan sosial ku e ta “firme” i na mes momentu a publiká algun potrèt for di prizòn di New York kaminda e ta será for di despues di a keda kapturá pa forsanan norteamerikano.
Maduro i su kasá Cilia Fores a keda kapturá na Caracas den un operashon militar norteamerikano den luna di yanüari. Nan ta será den un prizòn di Brooklyn akusá di trafikashon di droga i poseshon di armanan di kandela, delitonan ku tur dos ta nenga. “Mi ta manda e potrètnan aki komo un regalo chikitu na mi ñetunan i na tur hende di bon kurason ku ta stima nos”, segun el a skirbi riba Telegram. “Mi ke pa bosnan sa ku nos ta firme, ku kurason kargá di amor pa bosnan”, el a agregá.
Riba e dos potrètnan ku a keda publiká, Maduro ta bistí na un trahe shinishi miéntras ku e ta hasi gesto di pas ku su mannan. Por tuma nota ku el a pèrdè hopi peso. E agensia di notisia AFP no por a verifiká e outensidat dje potrètnan i e teksto.
Aunke ku e potrètnan a keda publiká ayera, por mira ku nan tin fecha di registro di kámara dia 25 di yüni, un dia despues dje dòbel temblor ku a laga 6.500 morto na Venezuela i a kousa daño material inmenso.
“Nos ta sigui fuerte, sereno i ku konfiansa: Dios ta ku nos. Dios lo proveé. Venezuela lo nase bèk”, segun e ta bisa mas aleu.
E mensahe a keda publiká dos dia despues ku su susesor, e presidente interno, Delcy Rodriguez, a anunsiá un akuerdo petrolero históriko ku ta permití pa Merka operá henter e negoshi di petrolio di Venezuela.
Rodriguez ta goberná bou di preshon fuerte di Washington i ta splika di “a skohe e kaminda di diplomasia” ku Merka.
Den prizòn Maduro no tin akseso na korant ni internèt, pero e ta outorisá pa papia via telefoná ku su famia i abogadonan pa mas o ménos 300 minüt pa luna, ku un espasio di 15 minüt pa kada yamada, segun un fuente yegá na Maduro.
Su yu Nicolas Maduro Guerra a duna di konosé ku su tata ta den bon kondishon i ku e ta dediká su tempu na estudio di beibel.
E kaso penal na Merka kontra di Maduro i su kasá lo kuminsá dia 1e di yüni di 2027, segun tribunal federal di New York a anunsiá na fin di luna di yüni.