WILLEMSTAD.- Un dje kosnan positivo ku nos a ripara den e Gran Marcha dje aña aki ta un oumento na karosa bon akabá. Den pasado ‘DEN E BEMBE’ na diferente okashon a yega di asentuá riba e echo ku pa bo sigui engrandesé bo Karnaval mester tin mas karosa bunita den e marcha.
Fresku ta den nos memoria kon nos a te hasta sugirí pa aserka kompanianan grandi pa spònser e karosanan aki, dje forma ei krea un kompetensia tambe entre empresanan ku ta spònser un karosa.
E aña aki nos a ripara ku vários grupo, e dos partisipantenan individual i tambe e karosa di reina di spònser pa Digicel a pèrkurá pa un karosa impaktante. Trabounan di entre otro Giovanni Abath i su tim di Kara Productions, Bert Isenia i The Bito’s ta di apresiá.
Nos ta kere firmemente ku si gruponan traha riba un karosa nos Gran Marcha lo lusi aun mas tantu. Riba foto djis algun dje karosanan ku a impreshoná durante di Gran Marcha.
