GENERAL VILLAMIL, Ecuador.- Por lo ménos nuebe persona a keda asesiná djasabra ora ku nan tabata hunga biar den un bar di un siudat turístiko den zùitwèst di Ecuador.
Esaki ta otro krímen serio den e pais, ku den promé mitar dje aña aki a konosé 4.051 asesinato, segun sifranan ofisial. Ekspertonan ta konsiderá ku ta e promé mitar di aña mas violento den historia resien dje nashon.
Segun ministerio publiká, “suhetonan armá a drenta e lokal i a kuminsá tira riba esnan presente”. Potrètnan ku a bai viral a mustra por lo ménos nuebe kurpa sangrando riba suela, rònt dje mesanan di biar.
Segun e outoridat di Guayas, Marcela Aguiñaga, “e violensia no ta duna sosiegu. E ke pa nos bai na rudia, keda ketu i kustumá na horor. Pero nos lo no hasi esei, nos no ta entregá”.
Organisashonnan di droga a multipliká den e pais, ku un tasa di asesinato ku a krese for di 6 pa 100.000 abitante den 2018, pa 38 pa kada 100.000 den 2024.
Siman pasá, den e provinsia Manabi, área dominá pa e narkotrafikante Fito i su banda Los Choneros, por lo ménos 20 persona a pèrdè nan bida den diferente masakre i asesinato. Djis despues a rekapturá Fito.
Despues dje detenshon, Fito a aseptá pa e keda ekstraditá pa Merka kaminda e ta keda akusá di tráfiko di kokaina i arma.
Ecuador, un tempu un oásis di pas den Amérika Latina, awendia ta un dje nashonnan mas violento di e region pa motibu dje guera entrega gruponan ku ta probechá di su hafnan stratégiko, su ekonomia dolarisá i korupshon di algun outoridat.
Hafnan dje pais ta transitá 73% dje kokaina produsí na mundu, segun fuentenan ofisial. Den 2024 e pais a konfiská e rèkert di 294 tòn di droga, prinsipalmente kokaina, kompará ku 221 den 2023.
