NEW YORK.- New York Yankees ta demostrando interes den e shortstop yu di Kòrsou Andrelton Simmons. E organisashon di forma konsiente a laga Corey Seager i Carlos Correa firma ku otro ekipo i awor ku un montante sólido pa gasta, nan a kuminsá wak den rònt i a demostrá interes den entre otro Simmons.

E shortstop di 32 aña ya ta un veterano kende a hunga ku Atlanta, Los Angeles i Minnesota. E tin un defensa konsistente den short pero den e parti ofensivo no ta kuadra eksaktamente ku loke Yankees ta gusta. Ku su atributonan defensivo élite, ku porsentahe di fildeo di .976 ku 12 eror den 1091.2 inning e aña’ki, Yankees sigur lo ta deseá di tin e na e puesto pa evitá mas fayo na un posishon asina vulnerabel.

Despues di a mira Gleyber Torres e último temporadanan, manager Aaron Boone lo tin muchu mas konfiansa den un hòmber manera Simmons na e posishon. Su mihó temporada defensivo ta data di 2015 tempu ku el a marka un porsentahe di fildeo di .988 den 1.279 inning. El a gana kuater Wante di Oro i  na tres okashon tabata den e Top-15 kandidatonan pa MVP.

Ofensivamente e no ta gran kos, ku un averahe di .223 ku tres homerun i apénas 31 RBI den 2021, apénas un aña despues di su averahe di .298 den 2020 durante e temporada di COVID.

Den 2018 ku el a hunga 146 wega, el a bati pa averahe di .292 ku 11 homerun i 75 RBI, ku tabata apénas un dje tres temporadanan ku el a bati riba 10 homeurn. Pero di otro un banda, e tin un ‘strikeout rate’ di apénas 7.3% pa temporada, loke ta kasi inkreibel. Simmons ta mas un ‘contact hitter’, algu ku ta un nesesidat grandi serka Yankees. Durante di temporada 2018, el a liga 120 hit, 26 doblete, 5 tripel.

Ounke ku Simmons no ta eksaktamente e loke Yankees ta buska komo solushon riba término largu, pa awor aki e por sera un buraku miéntras ku e ekipo ta warda pa Anthony Volpe i Oswald Peraza alkansá MLB.

LAGA UN KOMENTARIO

Please enter your comment!
Please enter your name here