Eks presidente merikano Barack Obama
WASHINGTON, MERKA, AFP.- E eks presidente merikano, Barack Obama a ekspresá su duda pa ku e akuerdo nobo entre Merka i Iran. El a bisa ku esaki lo no ta mihó ku esun ku el a negoshá na aña 2015, segun deklarashonnan publiká djadumingu.
Presidente Donald Trump ta negoshando un posibel akuerdo pa pone fin na e konflikto, kual Merka a kuminsá kuné na Iran. E kombersashonnan ta inkluí e programa nuklear iraní, eliminashon di e sanshonnan i seguridat den estrecho di Hormuz, kual ta un ruta klave pa transporte di petroli.
Trump ta purbando di yega na un akuerdo nobo, despues ku el a bandoná e pakto nuklear di 2015, konsiderando ku esaki no ta sufisiente.
“No ta probabel ku lo negoshá un otro akuerdo òf unu mas mihó ku loke ya nos tabatin”, asina Obama a bisa den un entrevista ku ABC News.
El a añadí ku e akuerdo a funshoná te ora ku Merka a disidí pa bandoná esaki na aña 2018, durante e promé mandato di Trump.
