SEVILLA, SPAÑA, AP.- Presidente Barack Obama a pidi polis di Merka pa demostrá mas toleransia, rèspèt i komprenshon ku e hendenan ku nan a hura di protehá.
Obama a pidi e hendenan pa respetá polis, kual ta keda akusá pa brutalidat i intoleransia, partikularmente ku hende koló skur.
“Mi kier pa tur dos banda skucha otro”, segun indikashon di Obama despues di a reuní ku e presidente interino Mariano Rajoy na Spaña.
Esaki tabata e di kuater dia konsekutivo kaminda Obama a papia tokante e susesonan na Merka.
E susesonan ta inkluí morto di vários hòmber na man di polis na Louisiana i Minnesota i e matansa di sinku polis koló kla pa un frankotirador koló skur na Dallas.
Desena di persona a keda detené djasabra anochi i djadumingu mardugá na St. Paul, Minnesota, kaminda binti polis a keda heridá ku piedra i bòter tirá pa manifestantenan. Na Louisiana, un aktivista di e movementu Black Lives Matter a keda detené durante e protestanan di djasabra anochi na Baton Rouge, Louisiana.
Obama a bisa ku violensia kontra polis provoká pa un persona preokupá pa e falta di imparsialidat den e sistema di hustisia penal “no ta hasi un fabor na e kousa”.
