DALLAS, AP.- Den un seremonia pa e polisnan asesiná, presidente Barack Obama a deklará djamars ku un siman di violensia a eksponé “fayonan mas grandi den nos demokrasia”. Pero el a insistí ku e pais no ta asina dividí manera e ta parse di ta i ta buskando puntonan en komun pa apoyá igualdat rasial i hustisia.
Obama a rekonosé ku e merikanonan ta asotá pa tiroteonan riba kaya i ta buskando respuesta na violensia ku a generá protesta den e siudatnan i a sòru pa un divishon rasial den e pais.
Sinku polis di Dallas a keda asesiná djaweps siman pasá miéntras esakinan tabata vigilá un manifestashon di algun shen persona ku tabata protestá pa morto di hòmbernan di rasa koló skur na Louisiana i Minnesota na man di polis.
“Ta difísil pa no pensa ku kosnan por bira pió”, segun Obama a bisa. ” Nos mester rechasá e desesperashon aki”.
Obama a uni polítiko, polis i famia di e víktimanan despues di e asesinatonan pa un hòmber afroamerikano ku a bisa ku e kier a venga pa e morto di hòmber koló skur na man di polis.
