Un speransa ku no ta defroudá.
Un speransa ku tin su fundeshi den Hesu-Kristu: ku ta kaminda, bèrdat i bida, ku a bini pa sigurá ku Dios Tata ta stima nos i ta warda nos na su kas selestial…
Iglesia Katóliko ta invitá tur rumannan di e seis isla ku ta forma nos Diósesis di Willemstad pa selebrá un aña di Hubileo, un aña di hubilá, un aña di grasia:
– pa nos kana huntu komo “peregrinonan di Speransa”:
⁃ pa sende den kada kurason e kandela di amor;
⁃ pa laga e simia di Evangelio krese i transformá henter humanidat;
⁃ pa e grasia di Hubileo trese e legria, pas den mundu;
⁃ pa nos deskubrí den e signonan di tempu e sabiduria di Evangelio.
Nos ta kere ku tur loke Dios a krea ta pa hende rekonosé i disfrutá di su bondat:
– ku bondat ta triunfá semper riba maldat.
– ku tur hende ta karga speransa pa hustisia i pas por reina.
Rumannan, laga nos selebrá e momentu presente ku gradisimentu i laga nos mira futuro ku speransa.
Laga nos habri porta di nos kurason, di nos kas di famia, di nos pais pa Señor drenta i iluminá ku su presensia tur loke ta skur. Lag’é sende e amor den tur kurason, kita divishon, kita odio i renkor…
Habri porta na bida di yunan ku ta nase, di famia, di parehanan hóben, di ansianonan…
UN FELIS BENDISHONÁ 2025!
Mgr. Luis Secci
Obispu di Willemstad