Obispu Luis Secco: Pa den 2017 un i tur pa praktiká no-violensia komo un estilo di bida i di polítika.

WILLEMSTAD – Ta un tradishon ku Obispu di Willemstad, Luis A. Secco, SDB ta duna su deseonan pa Aña Nobo 2017. Inspirá pa e mensahe di Papa Francisco, Obispado di Willemstad ta deseá pueblo di Kòrsou i komunidat di e seis isla ku ta forma Obispado, un Aña Nobo 2017 yen di pas i prosperidat “praktikando no-violensia komo un estilo di bida i di polítika”.

Kon nos por realisá e mensahe aki?

“Na promé lugá, nos ta deseá pas pa kada hòmber i muhé, hóben i mucha, i alabes nos ta pidi Dios Tata yuda nos rekonosé ku nos ta imáhen i semehansa di Dios, ku nos ta regalo sagrado pa otro i ku den situashonnan difísil di konflikto, nos tin ku respetá semper e un dignidat inmenso ku kada persona.”

Obispu a isgui bisa ku alabes e mensahe di Papa Francisco riba no-violensia, ta toka nos realidat históriko, kultural, religioso di Kòrsou den e momentunan aki. “Nos tambe ta reflehá e situashon di e mundu aktual globalisá: nos ta un pueblo fragmentá, un pueblo ku ta deseá i buska su identidat, pero ta mustra deskonfiansa i poko konsistensha. Nos komunidat ta den nesesidat serio i urgente pa topa ku otro den un enkuentro spiritual profundo i sinsero, ku ta krea e posibilidat pa uni ku otro i kaba ku divishon.” Spesialmente den e tempunan insigur aki, ku nos komunidat ta pasa den un siklo visioso di violensha verbal, violensia físiko, violensia doméstiko, kriminalidat, falta di rèspèt pa e individuo, falta di rèspèt pa nos leinan, pa nos norma i balornan, falta di rèspèt pa kas di famia i derechonan humano, nos pueblo ta kansá di e situashon aki i ta buska refugio den brasa di Señor!

Laga nos mira e Aña Nobo 2017 aki komo un oportunidat pa nos pueblo rekobrá i reforsá su fe, su rèspèt propio, su speransa, i krea poko poko e union pa por enfrentá futuro ku optimismo, esaki lo ta un logro enorme!

“Mi ta hasi un apelashon na esnan ku a haña e responsabilidat di guia nos komunidat komo lider polítiko, sosial, spiritual. Laga nos ta un ehèmpel, un “role model” sea komo adulto òf hóben, komo mama òf tata di famia, komo maestro òf lider sindikal.” Laga nos tuma e palabra di Madre Santa Teresa komo guia di e Aña Nobo aki: “Den nos kas di famia no tin nesesidat di armanan, di destruí pa trese pas, sino di biba uní, di stima otro, i asina nos lo ta kapas di superá tur malu ku tin den mundu”. I papa Francisco ta bisa aserka: “Pasobra e forsa di e armanan ta gañoso, ma e forsa di esnan ku ta praktiká no-violensia ta traha silensiosamente yegando na kurason di kada persona pa medio di e arma di amor i miserikòrdia… Laga kada un di nos famia bira un espasio privilegiá pa siña komuniká ku otro, kuida otro, pordoná otro. I asina for di e kurason di kada famia e pas i legria lo plama na henter komunidat”.

Rumannan, na nòmber di Obispado di Willemstad, mi ta invitá un i tur pa praktiká no-violensia komo un estilo di bida i di polítika.

Riba e promé dia di aña 2017, fiesta di Maria Mama di Dios i di Hornada Mundial di Pas, laga nos ta pidi Mama Maria, Reina di Pas pa kada un di nos uni ku otro den un gran kadena di orashon i di gestonan positivo pa bira “instrumento di pas”.

Asina Obispu di Willemstad, Luis A. Secco, Boso sirbidó den Hesus i Maria, a finalisá bisando.

SHARE

LEAVE A REPLY