Teatro kadaken ta presentá e siman ku ta bin aki, e obra Chakutoe. Direktor artístiko ta Gibi Basilio miéntras ku aktornan ta Albert Schobaar, Norma Cova, Guenn Ramon Gustina, Tisjaira Martina i Roley Kelkboom kende por sierto tin e ròl di Chakutoe. Premier lo ta djárason 27 di mart pa 8 or di anochi den la Tentashon. Lo kana ku e presentashon di mart te ku novèmber awor. Lo bai tin diferente presentashon i karchinan ta optenibel na Mensing’s Caminada i Van den Tweel Zeelandia.
Gibi Basilio, direktor artístiko di e obra a konta Djasabra ku ku e ta kòrda hopi aña pasa ku a pone un potrèt di Felix Chakutoe den Otrobanda promé ku e busto a bin. Na e okashon ei el a tira un diskurso i ora a pidié pa e skibi, esun di Chakutoe a yama su atenshon mesora. “Mira kon mi a tira un diskurso ora bin ku potrèt di Chakutoe komo un di nos gran lidernan, pakiko no mi skibi un obra den e kuadro ei”. E obra su kuadro ta añanan 1920, spesial den añanan 1922, kasi 100 aña pasa i e lucha den haf kaminda trahadónan di haf a haña tende ku ta bai baha nan suèldu i esei a lanta henter un malkontentu ku a pone ku el a kana for di aprel te yüli ora el a eksplotá. Chakutoe komo nabegante a yega Kòrsou na yüni, nèt un luna promé i el a tende kiko ta sosodé i a kumpra e lucha. No tabata su lucha pero a yega i haña e trahadónan den wèlga, pero no tabata bon organisá i el a tuma e batuta i dirigí henter e wèlga aki i ku a resultá finalmente den e eksplotashon 17 di yüli ku resultado fèrfelu di 4 morto, diferente herido, a kibra diferente lugá pero a firma e promé akuerdo kolektivo di trahadó. E promé sindikato real Santelmo di 1922. Esei tabata un gran logro e tempu ei.
9 aña prisòn pa Chakutoe….
Pero nan a sera Chakutoe tambe. El a haña 9 aña pero a haña klemensia i a sinta 3 aña so. E obra no ta bai riba esei so pero e ta bai riba un famia pober di e tempu ei kon nan ta lucha pa tene kabes riba awa. Bo tin mama Stang ku Magdalena su yu muhé, Tirso yu hòmber i ròl di iglesia katóliko ku tabata fuertisimo, ròl di plaka ku ta doñonan di barku i e ròl di gobernashon den e kaso aki gobernadó. Bo tin esena ku e tres podernan ei ta bin huntu. I asina ta sera konosí ku e époka ei, e ròl di iglesia, e bida sosial, pader, enseñansa, trabou, tur huntu den e obra Chakutoe.
Hopi investigashon…
Pa a yega na e obra aki Gibi a hasi basta investigashon. El a bai archivo i a tuma basta luna pa buska informashonnan nesesario. Lesa hopi pa mas informashon. No ta un dokumental pero un obra ku tin den dje realidat pero tambe tin fiktisio. Mama Stang ta un hende ku tabata eksistí pero a krea un historia rònt di dje i dun’é dos yu pa asina tin un historia den e totalidat ei,. E preparashon pa buska informashon ta tuma tempu i despues skibi. Ta kuenta di pone skrap i pone skrap. Un proseso largu pero dushi pa Gibi a haña sa mas di Chakutoe mes i di e wèlga.
Diferente mensahe….
E mensahe ku nan ke trese ta diferente. Un di nan ku Gibi ta saka sentral ta loke Chakutoe a para pe., Un hende simpel, nabegante, poko skol, ku ta mira ku inhustisia ta algu malu i ta tuma batuta ku ta lucha kontra inhustisia te final i si e tin kosta su bida e ta bai pe. Hende mester tin meta den bida, un vishon, un pashon i nada mester por stòp bo pa logr’e. Esei ta mensahe, perseveransia, i sigur organisá. Gibi a splika ku promé tabatin un wèlga pero no bon organisá. Ku esaki nan ke mustra ku ora bo ta bon organisá i struktura e logronan ta mas grandi. I mester honra nos lidernan, nos luchadonan i Chakutoe kisas hopi hende no sa hopi di dje i esei e obra ta para pe. Gibi a bisa ku nan ke pa promové lidernan i ohalá esei lo ta simia pa lider nobo den e komunidat aki.
Ta kasualidat….
Ora a bin e idea pa e obra no tabatin nada di loke ta pasando aktualmente i por papia di un kasualidat ku a obra nèt na e momentunan aki ku kos ta turbulento serka trahadónan. Gibi “kisas por bisa ku ta Chakutoe mes a trigger nos i ta bale la pena nos pone atenshon an nos manera di lidera kos, sindikato si mira e ròl di sindikato di ántes i awor. E tin tiki kasualidat den dje i Chakutoe den su graf masha dia lo ta bòltu i puntra ta kiko ta pasando ku sindikalismo, i kiko a hasi ku e promé sindikato Santelmo. I hustamente e ta bai trigger hopi kos den en komunidat aki entre otro kompará 1922 ku awor i wak kon kos ta”.
“Laga nos hasi e algu ku parse un poko kasual, hasi un realidat i mensahe bon kla pa komunidat”, Gibi Basilio a splika.
25 esena….
E obra lo ta un ora i mei di durashon. Gibi
konsientemente a skohe Albert Schoobaar pa yud’e pasobra e tin un eksperensia amplio riba e tereno aki. Lo tin 25 esena, na kas di famia, iglesia, pader ku e hoben, sprockel ku ta presidente di e Volksbond e tempu ei, e reunion di triángulo, wèlga i hopi mas. E obra ta tuma lugá na La Tentashon, den Otrobanda i ku tin un nifikashon masha importante, mirando ku ke basha e lugá abou. Gibi a bisa Djasabra ku nan lo sigui boga pa la Tentashon keda eksistí.
Spesial pa skol….
E obra Chakutoe ta traha prinsipalmente pa skol. I p’esei nan ke pa skolnan hasi uso di e oportunidat i bishita e obra pa mira e obra. Nan lo haña preparashon promé i despues ku e hóbennan wak e obra. “Nos ke pa nan konosé e obra, e historia, Chakutoe i ku simia di liderazgo lo kai serka nan tambe”, Gibi a bisa.
Albert Schoobaar i Roley Kelkboom..
Djasabra por a tuma nota di un pida esena di e obra aki entre Chakutoe (Roley Kelkboom) i Sprockel (Albert Schoobaar). Bosnan fuerte, un kier a dominá otro pero niun dos kier a baha kabes…….
Sprockel tabata lider di Volksbond, un organisashon liga na iglesia ku tabata yuda hendenan di ménos rekurso. Den e obra aki Sprockel ta yuda hende di ménos rekurso tin konfrontashon ku Chakutoe debí na e maneho ku Sprockel ta hiba, su pensamentu i si idiologia. Albert Schoobaar tambe tin e ròl di pader Verriet, tambe e ta bewaker i tin ròl di gobernadó. Pa Albert e kos di un reto mas grandi ta pa duna e personahe bida, kiko ta hasi kada un diferente for di otro i buska kon kada un ta papia i move. I e reto ta pa duna bida na e palabranan di Gibi Basilio. I tambe pa e públiko komprondé e mensahe. Pa Albert Schoobaar aktua dilanti di públiko ta trese basta nèrvio. “Mi no por kit’e. Semper mi ta nèrvioso voral ora di e premier. Esaki ta historia di mi bida, mi ta keda nèrvioso. E ta insoportabel na kuminsamentu i semper bai bo ta bolbe hasié. Pero e ta dushi”, asina Albert a bisa.
Roley Kelkboom ta Chakutoe..
Ta trata di un nabegante, un hende ku tin un sentimentu spesial pa hustisia i ora tin inhustisia e ta Sali pa defendé. Den e kaso aki el a kaba di bin di afó i konstatá situashon riba waf i el a duna aporte i resultá den lider ku a hiba e lucha di e wèlga. Roley a splika Djasabra ku e tabatin basta aña sin ta aktua, pero e ta bek riba esenario. E ta Kontentu di por ta Chakutoe den e obra aki. Pa Roley aktua dilanti di públiko ta loke e ta gusta i p’esei e ta bai fásil. E ta prepará su mes bon.
(pone den kader)
Fondonan:
Prins Bernhard Cultuurfonds Caribisch Gebied
Het Fonds Podiumkunsten
BankGiro Loterij Fonds
Esena ku a graba ta un dialogo entre Chakutoe i Sprockel!
(Pone den kader)
Estreno: 27 di mart 2019 di 20.00 pa 21.30
Fechanan di presentashon: 5, 6 i 7 di aprel / 3, 4 i 5 di mei 2019
Lugá di presentashon: La Tentashon
Orario di presentashon: 20.00-21.30or djabièrnè i djasabra & djadumingu 17.00-18.30or
Karchi di entrada optenibel na: Mensing’s Caminada i Van den Tweel Zeelandia
Por kumpra karchi online: Like nos page riba facebook pa mas informashon
Preis di entrada: Naf 27.50
Periodo di presentashonnan: Mart te ku novèmber 2019
Obra ta pa hoben di 12 aña bai ariba i adulto.
