Ecuador pasando den lunanan di hopi krímen relashoná ku trafikashon di droga. Ta referí na 1.600 asesinato den promé trimèster dje aña ki.
QUITO, Ecuador (AFP).- Polis di Ecuador a informá di a deskubrí ocho kadaver den sakunan di plèstik den parti zùitwèst dje pais, konsiderá stratégiko pa narkotráfiko. Ecuador a keda transformá den un dje paisnan konsiderá komo stratégiko pa trafikashon di droga, meimei di un krísis enorme di violensia. Awendia e pais ta un dje paisnan mas peligroso dje kontinente pa e violensia di vários gèn dediká na narkotráfiko, tambe ekstorshon i otro krímennan.
“Ta investigando e asuntu di ocho kadaver aki ku a keda deskubrí djis pafó dje poblashon di Babahoyo”, segun e hefe polisial dje zona, Gali Muñoz.
Djadumingu último, ocho persona a disparsé na momento ku nan tabata riba un biahe for di e siudat Daula pa Milagro, tur dos den zùitwèst dje pais.
Investigashon mester determiná awor si e kurpanan ku a haña ta korespondé na e personanan ei, segun e Ministerio di Interior, John Reimberg. Huntu ku e kurpanan a haña un nota ku ta bisa ku ta un “atentado” dje grupo kriminal Los Lobos kontra di Los Choneros, dos di e gruponan violento prinsipal di Ecuador. E guera entre e gènnan a hisa e sifra di asesinato na e rèkert di 51 pa kada 100.000 abitante. Segun e fiskal, Modesto Freira, “no por a mira kara dje viktimanan pa motibu ku nan tabata den un saku di plèstik”.
Ecuador ta konta ku tránsito di 70% di kokaina di su bisiñanan Colombia i Perú, produktornan mundial prinsipal dje droga ei.
Den promé trimèster dje aña ki ya nan a mata den kareda di 1.600 persona na Ecuador.
