Polisnan presente na e kas den Shreveport, Louisana, kaminda e drama a tuma lugá.
WASHINGTON (AFP).- Ocho mucha a muri den un seri di tiroteo djadumingu mainta den e estado di Louisana, den zùit di Merka, den loke ta parse un suseso di violensia doméstiko. E suseso, ku a tuma lugá poko despues di 6’or di mainta den e siudat di Shreveport, ta bira e tiroteo masivo ku mas morto na Merka den último dos añanan.
Esun ku a tira, kende su identidat no a keda revelá di forma dirèkt, a muri tirá pa polis despues di un persekushon den outo. E bosero polisial Chris Bordelon den konferensia di prensa a bisa ku e esena dje krímen ta “bastante grandi” i ta kubri tres kas. Edat dje víktimanan ta varia entre unu i 14 aña.
Segun polis algun dje muchanan tabata den e kas i ta famia di esun ku a tira. Otro dos persona tambe a keda heridá pa e tirunan, ounke no a duna detaye den nan estado di salú.
E sospechoso a hòrta un outo i a hui promé ku polisnan a tira riba dje. Ningun polis a resultá heridá. Segun polis, nan ta kere k’e ta e úniko persona ku a lòs e tirunan na e sitionan.
Merka, kaminda ta fásil pa un hende por yega na un arma di kandela, ku frekuensia ta esenario di violensia armá, ku míles di hende ku ta pèrdè nan bida kada aña.
