…Presidente mehikano, Claudia Sheinbaum, kende tin hopi konfiansa ku e diálogo ku el a hiba ku Donald Trump lo benefisiá su pais…
CIUDAD DE MEXICO (AFP).- Rondoná pa desena di míles di simpatisante, e presidente di México, Claudia Sheinbaum, a duna di konosé ku e tin konfiansa ku e diálogo ku Donald Trump lo dera e menasanan dje mandatario norteamerikano pa imponé impuesto riba importashonnan for di México.
Durante di un reunion konvoká pa selebrá un akuerdo ku e republikano pa retrasá te ku 2 di aprel awor e anunsio di impuesto di importashon, Sheinbaum a deklará di ta optimista riba un areglo ku ta rekonosé plenamente e tratado i komersio liber entre Merka, Canada i México. Ta trata di e asina yamá T-MEC, ku lo risibí un gòlpi hopi fuerte si Washington disidí ku ta introdusí impuesto di 25% riba produktonan di su dos sosionan komersial.
Merka ta e destino di 80% di eksportashonnan mehikano.
Na un promé instante, Sheinbaum, kende su popularidat ta kore den kareda di 80%, a organisá e akto pa anunsiá “medidanan ku imouesto i medidanan sin impuesto” ku kua México lo a reakshoná den kaso ku Merka mantené e tarifanan.
Pero e magnate republikano a wanta aplikashon dje medida djaweps último despues di un kòmbersashon telefóniko ku Sheinbaum, afirmando ku el a hasi esei den konsiderashon ku e mandatario mehikano.
“Nos a bini huntu pa yama otro pabien pa motibu ku den e relashon ku Merka, ku su gobièrnu, e diálogo i rèspèt ta loke a prevalesé i nan a kita e tarifanan”, segun e presidente mehikano den un ambiente patriótiko.
