WILLEMSTAD.- Informashon di último ora ku a yega mesa di redakshon di EXTRA ta indiká ku outoridatnan polisial a detené e fotógrafo di prensa Umpy Welvaart. Dia 27 di ougùstùs último polisnan a detené algun sospechoso relashoná ku poseshon di droga riba e boto El Capo. E boto aki ta propiedat di e fotógrafo di prensa. Bosero di ministerio públiko a konfirmá pa EXTRA ku a detené e hòmber i ku investigashon ta kanando.
Riba e fecha menshoná Wardakosta a informá ku djaweps 22 di ougùstùs último den oranan lat di anochi, último e Sentro di Reskate i Kordinashon di Wardakosta a detektá un kontakto sospechoso riba radar. RCC a dirigí un patruya di Metal Shark di Wardakosta na e lokalidat pa por hasi un investigashon riba e boto. Durante di kòntròl riba e boto ku e nòmber El Capo, e patruya e topa algun pakete di kual ta sospechá ku e kontenido ta droga. Na bordo di e boto tabatin dos hende hòmber ku a nabegá ku e boto for di sùit bai Spaanse Water.
E dos personanan i e paketenan a keda entregá na KPC pa hasi mas investigashon. Entre tantu ayera nan a keda presentá dilanti hues komisario kual a prolongá nan detenshon ku ocho dia mas.
