WILLEMSTAD.- Ministerio Públiko a yega na
un desishon den e investigashon ku a keda entregá na posibel violashon di sekreto den funshon (ambtsgeheim). A inisiá e investigashon relashoná ku dos denunsia entregá dor di sr. Amerigó Thodé. Seguidamente ta sigui un splikashon tokante e motibu, e investigashon i desishon. Dia 4 di sèptèmber 2014 a tuma lugá un reunion di komishon será di miembronan di e komishon fiho di Finansa di Staten ku miembronan di e asina yamá Commissie Financieel Toezicht. Partinan di e reunion a keda grabá den sekreto i transmití na radio. Presidente di Staten sr. Mike Franco a hasí denunsia di esaki dia 15 di sèptèmber 2014. A sigui u investigashon penal riba òrdu di Prokuradógeneral dor di Landsrecherche Kòrsou. Relashoná ku e investigashon aki a start un proseso penal ku un veredikto den korte di Promé Instante dia 8 di yanüari 2016.
E denunsiante a entregá 28 di yanüari 2016 i 18 di mart 2016 denunsia kontra vários persona i instansia ku segun e denunsiante tambe a hasi nan mes kulpabel na violashon di sekreto den funshon. E denunsiánan a keda studiá i husgá pa Ministerio Públiko. Ta trata di denunsiánan kontra 20 persona i organisashon, entre nan 18 individuo, un asosashon i un partido polítiko pa violashon di sekreto den funshon kometé na 2013, 2014, 2015 i 2016.
E konklushon general di Ministerio Públiko, despues di a studia e denunsiánan, ta ku 19 di e 20 kasonan no a resultá den un violashon di un hecho kastigabel i no a resultá den un investigashon mas a fondo. Ta trata di entre otro deklarashonnan relashoná ku un bishita di trabou, reakshon riba un komunikado di prensa i/òf reakshon riba un reportahe públiko, tambe duna deklarashon riba un punto di bista polítiko i den algun kaso riba persona òf instansia ku no ta mará na un sekreto den funshon.
Relashoná ku un keho kontra un miembro di Parlamento, sr. Hensley Koeiman, tabata nesesario pa enkargá Landsrecherche Kòrsou pa hasi mas investigashon. Esaki relashoná ku un entrevista den korant i un entrevista na radio ku sr. Koeiman lo a duna dia 5 sèptèmber 2014.
Despues di 18 luna no tabata posibel mas pa haña e entrevista di radio. E entrevista na radio pues no tabata disponibel mas pa e investigashon. E entrevista den korant si tabata disponibel, pero no por a haña e deklarashonnan eksakto mas di sr. Koeiman. Ademas no a bin sali na kla den e investigashon ku sr. Koeiman tabata sa, òf rasonablemente mester a sospechá ku loke el a bisa tabata den violashon di su sekreto den funshon i ku e propósito tabata dirigí riba esei. E investigashon pa e motibu ei no a produsí prueba nan legal i konvisente pa entamá un huisio penal, p’esei a seponeer e kaso.
E denunsiante den su denunsia a hasi un apelashon riba igualdat den persiguishon. Ministerio Públiko den su husgamentu a konstatá sinembargo ku bèrdat tin similaridat, pero tin mas tantu diferensia identifiká. Serka sr. Koeiman tin por ehèmpel niun indikashon ku e tabata envolví den e grabamentu di e reunion, tabata di solamente un entrevista den korant, miéntras ku e a splika
motivá ku e no tabata sa ku e informashon duná tabata informashon sekreto ku el a hasi públiko. Den kaso Thodé sinembargo no tabata tin ningun duda den e demonstrashon di un hecho kastigabel; e tabata sekreto, e tabata sa esei miéntras ku e violashon tabata intenshonal i kometé vários biaha. Sr. Koeiman, kontrali na sr. Thodé, si a koperá kompletamente ku e investigashon.
Ministerio Públiko a pone esnan direktamente envolví na altura di e desishon pa seponeer e kaso a base di falta di prueba legal i konvisiente.
