GINEBRA, AP.- Organisashon Mundial di Salu a deklará emergensia internashonal di salu djaweps despues ku un brote di ébola e propagá den un siudat na Repúblika Demokrátiko di Congo e siman aki.
E komité di eksperto di OMS a ninga di konsehá e agensia di salu di Nashon Uni pa hasi un deklarashon riba e brote na tres okashon anterior. Pero otro ekspertonan a bisa ku e brote mortal a kumpli ku e standardnan pa deklará un emergensia internashonal kontra esaki.
Mas di 1.600 persona a fayesé for di ougùstùs, den e segundo brote mas mortal den historia, kual ta desaroyando den un region deskribí komo un zona di guera.
E siman aki a konfirmá e promé kaso di ébola na Goma, un siudat na nortost di Repúblika Demokrátiko di Congo na frontera di Ruanda ku un aeropuerto internashonal. Ekspertonan a pronostiká e susesonan aki ya pa vários luna kaba.
Un deklarashon di emergensia di salu mundial ta kapta muchu mas atenshon i yudansa internashonal, pero algun ta teme ku sierto gobièrnu nèrvioso por reakshoná di forma eksagerá i apliká restrikshonnan na frontera òf asta sera esaki.