Direktor general di OMS Tedros Adhanom Ghebreyesus
GINEBRA, SUISA, AFP.- Organisashon Mundial di Salú (OMS) a anunsiá djárason ku e brote di Hantavirus riba un barku krusero, kual a kousa pániko internashonal, mester terminá ofisialmente riba 2 di yüli.
Sinembargo, aunke e brote ta yegando na su fin pa personanan ku ainda ta den karentena, e trabou sientífiko apénas a kuminsá.
Investigadónan lo studia muestranan di e vírùs pa determiná si por desaroyá pruebanan, tratamentu i vakunanan pa brotenan den futuro.
A konfirmá 12 kaso i un posibel kaso relashoná ku e barku MV Hondius. Tres persona a muri debí na e vírùs.
E barku a sali for di Ushuaia, Argentina riba 1e di aprel. El a pasa vários isla den Atlántiko, inkluyendo Tristan da Cunha, promé ku el a sigui pa Tenerife, kaminda a evakuá sobrá pasahero.
E direktor di OMS, Tedros Adhanom Ghebreyesus, a informá ku outoridatnan di salú a identifiká mas di 650 kontakto den 33 pais i teritorio.
El a indiká ku tur kontakto, ku eksepshon di 54 persona, ya a kompletá nan karentena. Por spera ku sobrá ta finalisá esaki pa promé ku 2 di yüli.
Si pa e fecha aki OMS no detektá kasonan nobo, OMS ta konsiderá ku e brote a kaba.
