Bista di un área destruí despues di un atake di Israel kontra un depósito di kuminda kual a kousa dañonan grave kontra vários vehíkulo i tèntnan
GINEBRA, SUISA, AFP.- Organisashon di Nashonnan Uní a bisa djabièrnè ku e plan di Israel pa kontrolá 70% di Gaza Strip, probablemente lo oumentá sufrimentu di muchanan mas ainda. Mayoria mucha na Gaza ta biba den sitionan kompletamente yen i ku tiki espasio.
Promé minister israelí, Benjamin Netanyahu, a afirmá djaweps ku a duna ehérsito òrdu pa tuma kontròl di mas teritorio na Gaza Strip. Esaki ta un desafio pa e tregua ku a drenta na vigor den òktober.
El a splika ku ehérsito tin kontròl di 50% di e teritorio bou di términonan di e tregua i despues esaki a bira 60%.
“Mi intenshon ta pa kontrolá 70% di Gaza Strip”, asina el a añadí.
Pero Fondo di Nashonnan Uní pa Infansia (Unicef) a atvertí ku e medida lo empeorá e krísis di salú entre muchanan riba e teritorio. Ya nan ta gravemente afektá pa e skarsedat di kuminda, awa i akseso na higiena.
Asta promé ku e guera a kuminsá riba 7 di òktober 2023, Gaza ya tabata un di e sitionan ku tin mas persona ku ta biba riba un espasio chikitu, asina e bosero di Unicef, Salim Oweis, a splika.
Aktualmente, e pueblo ta biba konsentrá riba solamente 40% di e teritorio ku a sobra. Mayoria persona a buska refugio den edifisionan destruí, ruina i shushi.
