NASHONNAN UNI, MERKA, AFP.- E sekretario general di ONY Antonio Guteres a kondená e atake ku misil ruso kontra un edifisio di apartamentu den e siudat ukraniano di Dnipro ku a laga por lo ménos 40 morto, komo un posibel krímen di guera, asina e bosero a bisa.
“Un atake a gòlpia un edifisio residensial den Dnipro djasabra pasá den oranan di anochi, un di esnan mas mortal na Ukrania, for di dia e invashon a kuminsá na febrüari pasa”, asina Stephanie Tremblay a bisa na periodistanan.
E sekretario general a kondená e atake aki i a bisa ku e ta otro ehèmpel di un supuesto violashon di leinan di guera, asina el a agregá.
E kordinadó di ONU na Ukrania, Denise Brown a pidi un investigashon efektivo di e presunto krímennan di guera i e huisio apropiá di e sospechosonan, asina Tremblay a sigui bisa.
E balanse di atake na Dnipro a oumentá ayera te na 40 morto, miéntras tabata sakando mas kurpa for di e edifisio di apartamentu ku a keda bombardiá estilo soviétiko.
